Por Adrián Carbayales
Too entamó cuando Tanaka Tomoyuki, un productor xaponés, s’enfotó en facer una película de monstruos como eses americanes que tanto-y prestaben. Una como The Beast From 20,000 Fathoms, pensaba, y otres munches nes que’l xeniu de los efeutos especiales, Ray Harryhausen, usaba moñequinos qu’aparentaben ser bichos xigantescos. La teúnica yera la conocida como stop motion: facíen una semeya, movíenlu un pocoñín, y entós otra, y otra, y otra. Y asina, amodo, acababen componiendo una escena xunciendo milenta semeyes. Un trabayu bien llaboriegu. Anguaño, ainda sorprende contemplar la calidá de dalguna de les escenes de Harryhausen.
Por embargu, Xapón venía de perder una guerra mundial, y nun teníen perres pa coses tan abegoses. Asina, trabayando col director Honda Ishirō, l’espertu n’efeutos especiales Tsuburaya Eiji y un probe home amazcaráu de dinosauriu (al qu’apocayá homenaxaron nun anunciu de café), Tanaka acabó por estrenar Gojira, la película na que salió per primer vegada ún de los monstruos con más sonadía mundial. Bono, pal mercáu occidental llamáronlu Godzilla, y apunxeron unes escenes dafechu innecesaries con unos cuantos blancos, pero más o menos foi igual.
La película trataba d’un tema muncho más seriu de lo que podemos pensar si nun la vimos. Namás nueve años dempués de les bombes de Ḥiroshima y Nagashaki, presenta un monstruu al qu’espertó una esplosión atómica, qu’afara too al so pasu y escontra’l que l’exércitu xaponés nun ye a facer nada. Calca nes escenes de los estrozos y nel dolor de les víctimes, y nun pues dexar de pensar qu’eses víctimes nun son les d’un dinosauriu.
Sicasí, la película embruxiló a los neños que nun vivieren tales llaceries, y nun tardaron en facer más películes del xéneru tokusatsu (“efeutos especiales” en xaponés), yá pensaes pa ellos. Un añu dempués, Godzilla enfrentábase a otru monstruu, un tal Anguirus, y facíen de Xapón y les sos ciudaes un rin de llucha llibre, arreventando maquetes d’edificios mientres se componíen les costielles. En 1956 presentaben a Rodan, un terodáctilu escomanáu, y en 1957, unos estraterrestres malvaos usaben una especie de robó xigante pa tentar d’invadir la tierra. Y nun vamos siguir cuntándolos, porque nun acabamos na vida. Sí podemos comentar que lo de Godzilla escontra King Kong nun ye una idea nueva, yá lo fixeron en 1962, y que salieron milenta paxaraes más como aquella na que’l monstruu de Frankenstein s’engarriaba con un dinosauriu soterrañu y un pulpu xigante.
Les series de televisión:
En 1966, Tsuburaya creó pola so cuenta Ultra Q, una serie de televisión qu’amestaba’l mieu y la ciencia-ficción, de pol estilu de The Twilight Zone o The Outer Limits, y na qu’en cada episodiu surdía un monstruu nuevu, anque pa dellos usara faramacos reiguaos. Como la cosa nun tardó en facese repetitiva, tres d’unos meses estrenó Ultraman, na qu’un superhéroe xigante-yos plantaba cara. Ceo siguiólu’l so hermanu Ultraseven. Y ehí, la cosa yá se-yos foi de les manes.
En 1971 apaeció Kamen Rider, una serie d’un… a ver cómo describilu… un superhéroe/home-escarabayu/cyborg/motorista. Más o menos. L’actor protagonista mancóse grabando una escena, tuvieron de poner a otru y a la llarga acabó siendo vezu. Calteníase’l títulu, pero poníase-y un apellíu distintu a cada temporada p’aclariar que se cuntaba otra hestoria que nun tenía que ver cola anterior. En 1975 crearon un grupu superhéroes, caún d’una color, na primera de les series Super Sentai; lo que n’occidente conocemos como los Power Rangers. Los productores americanos cometen l’atomía de quitar les escenes nes que salen cares xaponeses pa sustituyiles poles de mozos multiétnicos (con mayoría de blancos, bultablemente), y entemécenles mal que bien coles de los faramacos, los robós y los monstruos. Los guiones de les versiones occidentales nun concasen muncho colos orixinales, arriendes de que son más simplones, y quien tea atentu verá cartelos en xaponés que se-yos colen en fondu, o coses asemeyaes. La verdá que, amás de nun ser mui políticamente correutu, ye bastante chambono.
Podríemos mentar series d’estes a esgaya, fasta una protagonizada pol mesmísimu Spider-Man, na que da cueres a estraterrestres montáu nun robó xigante. Sí, sí, daveres. Pero Kamen Rider y Super Sentai son especialmente relevantes porque entovía anguaño siguen produciéndoles. Un añu son magos, otru policíes, otru… a saber. Nos Super Sentai ye recurridísima la temática los dinosaurios. Claro, ye que llueu tienen de vender los moñecos, les armes, los metamorfosiadores… viéndese cuasi tolo que sal na pantalla, y toos sabemos que los dinosaurios siempres llamen a los guaḥes.
Pa quien tea interesáu y quiera adientrase nesti mundu, dende equí podemos aconseya-y qu’escomience per series como Kamen Rider Kiva (con temática de vampiros) o Jūken Sentai Gekiranger (con temática d’artes marciales). Anque alvertimos que, ainda con estes, y siendo muncho entreteníes, el choque cultural pue resultar ablucante.
Nun creyáis que ye too pa neños…
Podemos pasalo bien coles películes clásiques, que poseyen esi encantu camp que güei ye malu d’atopar. Les series modernes, pel so llau, tán bien pa los rapacinos, y por supuestu puen esfrutales tamién los mayores. Magar que si queremos daqué más específicu p’adultos, hai delles coses afayadices. Les series Garo (2005), Ultraseven X (2007), y Kamen Rider Amazons (2016) presenten superhéroes asemeyaos a los anteriores, pero con más violencia y en mundos más tenebrosos. Les películes de Godzilla foron tomando un tonu más escuru dende los años ochenta, y la cabera, Shin Gojira (2016), fai col desastre nuclear de Fukushima lo que la orixinal coles bombes atómiques. Dai Nipponjin (2007) ye otra película perinteresante; qu’usa efeutos CGI pero afítase na tradición del tokusatsu pa crear una traxicomedia estraordinaria que, como documental falsu sobre la vida d’un superhéroe llixanudu al que tomen a cuentu risa, trata con fondura la falta de sentíu vital na posmodernidá. Y l’estudiu Ghibli fixo un curtiu metraxe, Kyoshinhei Tokyo ni arawaru (2012), amosando que na dómina los efeutos dixitales entá cueye’l xéneru y los sos medios más artesanos.
Como vemos, el tokusatsu ye un xéneru con gran tradición, que toos conocemos anque munchos nun nos decatáremos, y que gocia de mui bona salú. Solo en 2020 estrenaron dos series d’Ultraman, les siempres presentes de Kamen Rider y Super Sentai (de les que tamién hai películes añales) y otra más de Garo. Amás, ta’l cómo usen los sos personaxes n’otros medios: Ultraman tien un anime en Netflix y cómics en Marvel, tenemos les superproducciones chino-americanes de Godzilla, y yá falen d’otru reiniciu de les películes de los Power Rangers, de los cualos Boom! Studios asoleya unos cómics que son tou un ésitu. Sicasí, ye verdá que les obres orixinales resúltennos exótiques por demás n’occidente. Ente los prexuicios polos que munchos refugamos consciente o inconscientemente les obres con actores non occidentales, l’estrañamientu que nos provoca la forma que tienen de facer los efeutos especiales, y la llonxanza cultural qu’hai pa con ellos (por casu, dellos códigos en tokusatsu remanecen del teatru xaponés), nun ye cenciello qu’estos productos llogren entrar nel nuesu mercáu. Pero ye daqué a lo que, lo menos, paga la pena asomar la cabeza y ver qué anden faciendo, conocer la realidá de la que dacuando nos lleguen reflexos.
