Allá nos años setenta, cola popularidá que taba teniendo Godzilla nos Estaos Uníos, Marvel fízose colos drechos de la franquicia pa espublizar cómics del dinosauriu radioactivu. Y ye que les franquicies taben mui de moda naquella, tamién teníen cómics de Planet of the Apes o de Star Wars, por mentar delles. Dambes dos, por cierto, qu’apocayá volvieron a la editorial, probablemente porque la primera pertenecía a Fox y la segunda a Lucasfilm; empreses compraes por Disney nos últimos años, al igual que Marvel.
Non va munchos meses que vos contábemos (equí y equí) la vuelta d’otres franquicies: les de los xuguetes de Rom the Spaceknight y The Micronauts, que tuvieron un ésitu importante como series de cómics de Marvel (de fechu, recuérdense más por estes que como xuguetes), y cuando esta perdió los drechos debalaron per otres editoriales ensin muncha gloria. La so vuelta a la Casa de les Idees empieza pola republicación de les sos series orixinales en tomazos “omnibus“, pero yá prometieron que pronto vamos tener material nuevo.
Y, de la mesma manera cola qu’empezaron estos anuncios, agora llega que van republicar los cómics orixinales de Godzilla. Anque, ye verdá, tovía nun tenemos confirmao si pa que’l monstruu quede pa llargo na compaña y salgan cómics actuales. Pero’l casu ye qu”esto resultaba’estos cómics se daben por inpublicables por problemes de drechos, y por fin vamos poder gociar d’ello los llectores d’anguaño.
¿En que consiste esta serie? Bono, Marvel tenía los drechos esclusivamente d’esti monstruu, non d’otros personaxes de la saga, y ye por ello que lu enfrentó, sobre manera, a un meka creáu pa la ocasión, Red Ronin, y a los axentes de SHIELD de tola vida. Tamién, por supuestu, a otros personaxes míticos de la compaña, como los Vengadores o los Cuatro Fantásticos, lo que ye un espectáculu que nun nos podemos perder. La cosa, por desgracia, nun duró muncho, la colección tuvo venticuatro númberos que son los que se recueyen nesti “omnibus”. Depués d’eso, el monstruu de Marvel empezó a llamase Leviathan y sufrió delles mutaciones que-y cambiaron l’apariencia, col envís de siguir usándolu ensin los drechos. Por fin, tres salir nuna o otra serie, paeció morrer en 2009, a manes d’Arcánxel, n’Uncanny X-Men #507. Pero la muerte nunca nun ye definitiva nel Universu Marvel, y dalgo nos diz que van inventar dalguna escusa pa trayelu pronto de vuelta.
