Nun ye namás que la duodécima temporada d’American Horror Story, col sotítulu Delicate, prometa una especie d’adautación del clásicu Rosemary’s Baby pal sieglu XXI. Ye que tamién tien unos fichaxes bien llamaderos. A Emma Roberts, bastante habitual na serie, únense como protagonistes la estrella Cara Delevingne y la tamién famosa (anque más bien por coses del corazón) Kim Kardashian.
La serie, como siempre, cuéntanos nesta temporada una hestoria nueva que ye independiente de les anteriores, pero cola diferencia de qu’esta ye la primer vegada qu’adauten una novela, Delicate Condition de Danielle Valentine (qu’acaba de ponese a la venta). Como argumentu, sabemos que nos presenten una actriz, Anna Victoria Alcott (Emma Roberts), encerrizada en que quier tener fíos y que nun aceuta lo que-y dicen los médicos de que sufrió un albuertu. Ella sigue sintiendo’l ñácaru, y tamién qu’hai daquién (o daqué) siguiéndola y asediándola.
Ye tamién la primer vegada que Ryan Murphy nun ye’l showrunner, pasando’l relevu a l’actriz y guionista Haley Feiffer, y la primera que la serie s’estrena en Hulu (nos Estaos Uníos, n’España lléganos per Disney+) y yá nun queda nada, ye pal venti de setiembre. Dexámosvos con un avance mui d’estilu videoclip (y non recomendable si vos dan cosa les arañes) que podéis ver calcando equí, asina como dellos cartelos promocionales, ún con cada actriz protagonista.
