Yá sabíemos que taba cociéndose una serie de la saga de videoxuegos, pero nun imaxinábemos que l’aspectu se viera tan increyible. Gracies a la esclusiva de Vanity Fair (que vos dexamos calcando equí), yá tenemos unes cuantes imáxenes que nos dexen claro que, pelo menos al nivel estéticu, la serie va ser bien fiel al mundu de los videoxuegos.
El matrimoniu formáu por Jonathan Nolan y Lisa Joy (los mesmos que ficieron Westworld) ye l’encargáu de dar vida al mundu posapocalípticu que, como pasa nos videoxuegos, vamos descubrir de la mano d’una sobreviviente d’un refuxu nuclear que sal a la superficie la primer vegada. A esta, Lucy, da-y vida Ella Purnell (Yellowjackets),y tamién tenemos nel repartu otres cares conocíes, como a Kyle McLachlan (Twin Peaks) faciendo de so padre y a Walton Goggins (The Shield) de necrófagu.
Bethesda confirma que la serie ye canon, conque tolo qu’asoceda nesta cuenta como parte del mundu de los videoxuegos. Ente les coses que van arriquecer l’universu, cuenten qu’una va ser contar l’orixe de Vault Boy, el moñequín roxu que ye tan característicu de la saga.
La estrena del primer episodiu espérase pal doce d’abril de 2024 n’Amazon Prime Video.
