Como vos contábemos l’otru día (equí), la serie de cómics Void Rivals, que s’nunciaba como un cómic indie más, dio la sorpresa, cuando salió a la venta, de que yera la coleición qu’abría la puerta al “Universu Energón”, nel que van convivir pelo menos les dos franquicies más importantes de Hasbro: Transformers y G.I.Joe. Asina, estés pasen de la editorial IDW, onde lleva en viviendo estos años, a la más relevante Image.
Tres el desvelamiento, como nun podía ser d’otra manera, anunciaron una riestra de series nueves que van dir espandiendo l’universu, y la más esperada ye, cómo non, la de los robós convertibles del espaciu.
Daniel Warren Johnson (Extremity, Wonder Woman: Dead Earth) ye l’encargáu al empar del guión y el dibuxu, y si nun lo sabíemos yá pol estilu tan característicu que tien, agora qu’asoleyen les primeres páxines de la serie podemos tener claro qu’esta va prestar pola vida a los fans señardosos de la serie animada. Y ye que, anque la continuidá de la hestoria empieza de nueves, colos Transformes aterrizando na Tierra, tien too la pinta de que va caltener l’espíritu como nunca, al empar que-y dan un toque de frescura.
Dexámosvos coles imáxenes de les primeres páxines y, tamién, con unes cuantes portaes del primer númberu, como ye vezu dende los años noventa p’afalar les ventes col coleicionismu y la especulación. Recordámosvos que s’estrena (nos EE.UU.) n’ochobre, mientres que la serie que sirve de precuela, Void Rivals, ta yá a la venta.
