Frankenstein, l’Hermanu Grande, la islla de Liliput, Sherlock Holmes, “ciudadanu” Charles Foster Kane, Twin Peaks, Harry Potter, don Quixote, Excalibur, el doctor Caligari, Popeye, los montes del allorie, Fu Manchú, Bob Esponxa, el Somarín Mariellu, Superman, el coronel Aureliano Buendía…
Podríemos siguir mentando personaxes, llugares y oxetos remanecíos de llibros, películes, series, obres de teatru, cómics y cantares… tantos que solo mentalos enllenaría un llibru bien gordu. Paecen nun tener nada que ver ente ellos, arriendes de ser creaciones del maxín, y por embargu tiénenlo. Toos son parte integrante de la hestoria más grande enxamás cuntada, conformada pali a pali por Alan Moore y Kevin O’Neill a lo llargo de dos décades. Una hestoria tan importante pa los autores que’l mesmu Alan Moore decidió despidise del mundu’l cómic col volume postreru. Tamos falando de los cómics de The League of Extraordinary Gentlemen, y si los nomamos cómics ye por nomalos de dalguna manera, porque, como vamos ver, trescienden tolos medios y xéneros.
Si por un acasu vistis la película, facéi’l favor d’escaecela. Cuasique nunca nun se cometió un crime de tal grandor escontra una obra maestra asemeyada. Una obra maestra que, amás de cuntanos una gran hestoria, ye a engranar cientos… non, qué digo cientos, miles de referencies a otres obres de ficción, faciéndoles toes participantes d’un gran universu y coneutándoles ente elles de formes impensables. Hai estudios que traten de sacar toles referencies, como estos de Jess Nevins, masque nunca nun vamos ser a conoceles toes (he dicir qu’anque nun saqué les más de les mentaes nesi estudiu, si fui quien a pescanciar delles, unes poquines, de les que Nevins nun se decata).
¿Y cómo son a coneutar toles obres y cuntar una hestoria ensin que rinche per tolos llaos? Les coses nun principien mui apuraes, l’entamu ye’l de lo que pue considerase una hestoria de superhéroes. En 1898, l’axente secretu Campion Bond. que vien d’una castra llarga d’espíes al serviciu de la corona británica, recluta a Mina Murray, acabante divorciar de Jonathan Harker tres d’un escándalu que la rellaciona con un noble foriatu. La so misión ye axuntar un equipu de persones estraordinaries y aparentemente muertes: el Capitán Nemo (retiráu nuna islla misteriosa), Allan Quatermain (l’esplorador qu’atopó les mines del rei Salomón, anque yá revieyu y drogadizu), el doctor Jeckyll (col so alter ego) y Hawley Griffin (tamién conocíu como l’Home Invisible). N’axuntándolos, habrán d’enfrentase a los enemigos de la corona, yá seya recuperando la cavorita robao (el material antigravitatorio col que l’imperiu quier llevar “los primeros homes a la lluna”) o faciendo frente a estraterrestres nuna “guerra de los mundos”. Poques gracies, esto nun ye más que l’escomienzu, y a lo llargo de los distintos volúmenes van facenos viaxar nel tiempu y l’espaciu per tol Mundu de la Ficción, desque un monolitu lluciu y prietu cayó na Tierra y unos homínidos entamaron d’adoralu fasta un futuru espantible nel que la xente vive en ciudaes acupulaes sol mandu d’un emperador interplanetariu.
Como resulta imposible facer una crítica de tola obra en conxuntu, yá que los distintos volúmenes tan fechos a lo llargo de venti años, con temátiques y estilos perestremaos, vamos tratar de facer una guía de llectura pa quien tea interesáu, con un resume de lo que pue atopar en cada parte. Ellí vamos:
- The League of Extraordinary Gentlemen, volúmenes I y II.
Equí atopamos el plantegamientu inicial, dos hestories d’aventures clásiques y ensin demasiáu fondu acullá les referencies que les tremen, pero feches con curiosura y que ye menester lleer pa cualesquiera a quien-y preste la lliteratura popular del sieglu XIX: Wells, Verne, Doyle, Stoker, Stevenson… El primer volume inclúi como complementu al cómic un rellatu pulp d’época, nel qu’Allan Quatermain viaxa per otros planos por aciu les drogues y enfréntase a espantos lovecraftinos (cola ayuda d’otros personaxes perconocíos). El segundu, un “almanaque del viaxeru” que nos describe abondos requexos del Mundu de la Ficción (teniendo mui en cuenta Los viaxes de Gulliver y les obres satíriques de pol estilu).
- The League of Extraordinary Gentlemen: The Black Dossier.
Acabante de cayer el gobiernu l’Hermanu Grande (los socesos de 1984 ocurren nel añu cuando Orwell escribió’l llibru, 1948), dos miembros de la Lliga cólense nes ruines del Ministeriu l’Amor pa robar un archivu con abonda información tocante a ellos. Nesti volume, Moore y O’Neill intercalen los testos y semeyes del archivu en custión col mesmu cómic, ocupando cuasi tantes páxines como la mesma hestoria: un cachu d’una obra perdida de Shakespeare, un cómic pornográficu del periodu del Hermanu Grande, un planu del Nautilus o un rellatu beatnik (inlleíble) son solo delles de les coses que tropezamos equí. Quiciabes el mayor defeutu d’esti volume ye que paez más un xuegu nel que Moore quier probar estilos distintos (que ye a asonsañar bien, nun vamos dicir que non), anque tamién ye verdá que’l volume paga la pena yá namás que pola visión que dan del villanu la obra, un axente secretu nomáu “Jimmy” (ñetu de Campion) del que nun dan apellíu pa nun se meter en problemes llegales. Anticipu: pónenlu pingando.
- The League of Extraordinary Gentlemen: Century.
Equí alcontrámonos con un viaxe al traviés d’un sieglu (pelos años 1910, 1969 y 2009) nel qu’acompañamos a la Lliga mientres tienten d’impidir la venida l’Anticristu. En realidá, Moore y O’Neill usen esti volume pa criticar lo que-yos paez el decayimientu de la lliteratura a lo llargo’l sieglu XX, siendo’l clímax de la crítica’l desvelamientu de qué personaxe (famosísimu) ye l’Anticristu. Pa mio idea, esti ye’l volume más problemáticu, pos el tonu de la crítica ye amargulíu por demás y pasen de lleldu coles referencies; hai tantes qu’acaben torgando’l ritmu la hestoria, porque resulta complicao nun se rucar con quiénes son les docenes de pasiantes qu’en cada viñeta arrodien a los protagonistes mientres falen peles cais. Como complementu al cómic vien una hestoria de ciencia-ficción al estilu esperimental de los sesenta, asitiada na lluna y que nos amuesa les munches creatures que la pueblen.
- La triloxía de Nemo.
Moore y O’Neill recuperen el tonu más llivianu de los dos volúmenes primeros pa cuntanos la vida y les aventures de la fía de Nemo, al empar que nos descubren requexos del Mundu de la Ficción que tovía nun viéremos. En Nemo: Heart of Ice, Janni Nemo ye una moza aínda insegura qu’esplora l’Antártida en 1925; en Nemo: Roses of Berlin, una pirata espavoriante que metanes la Segunda Guerra Mundial va a Berlín pa rescatar a la so fía de les zarpes d’Adenoid Hynkel (el Hitler de Chaplin); y en Nemo: River of Ghosts, una vieyina señardosa que fai una postrer espedición a la Tierra de Mapplewhite (“el mundu perdíu” de Doyle) allá pelos años setenta.
- The League of Extraordinary Gentlemen: Tempest.
Alan Moore despídese del cómic con esta obra, y ye al empar un cantar d’amor al mediu y una crítica xabaz a la so indutria. Bono, a tola industria cultural en xeneral, pero sobre manera a la del cómic. Nesta obra, qu’escomienza nel mesmu puntu nel que finó l’anterior, dambos dos autores amuesen una habilidá ablucante pa xugar colos xéneros y formatos propios del cómic. Cuando la hestoria se pon romántica, el dibuxu conviértese nuna fotonovela y los diálogos empalaguen. Cuando quieren cuntar dalgo cómico, los personaxes tórnense maragatos esgarabataos y nun pasen más que puros esparates. Pasamos de la color al blancu y negru, al cómic en dos colores (qu’antaño se facía p’abaratalos) y tamién a les trés dimensiones (que vemos con unes gafes que nos veníen en Black Dossier). Traten dellos personaxes col amor que namás que pue ñacer de que t’acompañen dende la infancia, y otros con una atomía nunca non vista. La crítica, por embargu, al tar envolubrada d’humor y ciñu, resulta enforma menos amargulida qu’en Century, y ye una forma estupenda de que se despida del mundu’l cómic ún de los más grandes autores que nunca nun dio. Como complementu, nesta ocasión tenemos una parodia d’una historieta de superhéroes de los sesenta (xuncida a lo qu’asocede na hestoria principal), y una páxina en cada capítulu que rinde honor a un autor maltratáu pola industria y olvidáu.
