Yá yeren doce les películes de Halloween, y cola estrena d’esta última hai quien yá ta perdidísimu. “¿Cómo que l’asesín nun ye l’hermanu de Jamie Lee Curtis?” preguntáronse yá cola de 2018, “¿pero cuándo cambiaron eso?” La continuidá de la saga ye una de les más complicaes de la historia del cine, conque vamos ufrivos una guía p’aclariavos un poco les coses.
La continuidá orixinal:
La primer película síguela darréu la segunda, nun pasa nin un minutu ento lo asocedío nuna y na otra. Na continuación, por embargu, afonden na motivación del asesín amazcaráu, Michael Myers, al descubrise que-y tien tanta tirria a Laurie Strode (Jamie Lee Curtis) porque ye la so hermana pequeña. La cosa va de matar hermanes, porque de ñeñu matara a la grande. La escamuchina paez acabar por fin, porque al malu piéguen-y como una docena de tiros y quémenlu vivu… Pero bono, yá sabemos cómo son estes coses. La tercer película pue obviase, porque nun tien nada que ver con lo asocedío nes películes anteriores. Quixeron cambiar dafechu de tema, en quedando Michael bultablemente muertu, y esta película va dotra cosa, d’unos robós asesinos… tamién na nueche d’ánimes, claro, d’ehí dexar el títulu. Por embargu, vamos volver un momentín a ella primero d’acabar l’artículu. A partir de la cuarta película, pola mor de la popularidá del asesín en serie, vuelven a la historia orixinal, esta vegada ensin contar con Jamie Lee Curtis. Cuéntennos qu’esta morrió, non ensin dexar primero una fía, y ye a por esta a por quien va Michael. De lo mesmo va la quinta, más o menos, y la sesta váse-yos de les manes cuando meten pel mediu una secta qu’entemez celtismu y satanismu y que fala de Myers como un escoyíu pa trayer el mal al mundu. Y ehí acaba, d’esa manera tan estrambólica, la saga orixinal.
La segunda continuidá:
P’anovar la saga, y da-y un reflundiu nuevu, decidieron volver a contratar a Jamie Lee Curtis, lo que, claro, nun casaba colo contao nes películes anteriores. Asina, decidieron borrales toes de continuidá, sacante les dos primeres, y estrenaron una película nueva ensin númberu que les siguiera. Llamáronla col repetitivu nome Halloween H20: Twenty Years Later, por estrenase y ambientase venti años dempués de la primera. Tres de los socesos de la segunda película, Laurie simuló morrer p’alloñase pa siempre de Haddonfield. Venti años dempués ye la direutora d’un internáu, con nome falsu y un fíu adolescente. Entós, Michael Myers, que nun taba muertu, taba enzarráu en siquiátricu, escapa y vuelve a entamala. Na siguiente película, Halloween: Resurrection, siguimos con esta llinia temporal, y (SPOILER) Laurie Strode acaba muerta. Paez que la cosa termina ehí, por fin.
Los remakes:
Estes nun tien munchu secretu. En 2007 y 2009, Rob Zombie fizo versiones nueves de les dos películes orixinales, y que nun tienen rellación con nenguna otra de la saga. Puen tar guapes, si te gusta’l direutor, pero nun hai más que sacar d’elles.
La continuidá nueva:
Pa la versión de 2018, y a la que siguen la de 2021 (Halloween Kills) y la que saquen agora (Halloween Ends), decidieron que nun merecía la pena nin salvar siquiera la segunda película, tienen en cuenta namás lo asocedío na primera. Y, asina, Michael Myers y Laurie Strode dexen de ser hermanos. Él lleva tola vida en siquiátricu, ella quedó traumada y, masque tuvo una fía, vive aisllada nuna casa enllena trampes, con milenta armes y de xuru republicana. Claro ta, Myers escapa, y vuelve a entamase (de nueves) una segunda vegada.
La teoría más lloca de toes:
Va años qu’anda per Internet una teoría de los fans pa facer casar toles películes, por esparatao que paeza poder facelo. Y la clave ta na tercer película, nesa que nun paecía tener que ver con toles demás… Porque, si paez que Michael Myers fai coses imposibles pa un ser humanu, que nun muerre nunca por muncho que lu frayen… ¡ye porque nun ye a él a quien estrocen, sinón a doblos robóticos d’él! La única prueba, en verdá, o la única sida na que sofitar esta teoría de los fans, ye que cuando Myers paez morrer na sesta película sal-y un líquidu marelludo, mui asemeyao a lo que-y salía a los robós aquellos de la tercer película. Y cuando Laurie Strode simuló morrer p’alloñase del pueblu (como cuenta H20) dexó atrás una fía, la de les películes cuatro a seis, mientres que se llevó l’otru. El porqué… bono, de xuru que pue inventase dalgo. Anque… ¿por qué puen tar creando doblos robóticos d’un asesín en serie? Home, pos de xuru que ye la secta esa céltico-satánica, ¿non?, pa que cometa rituales sangrinos de Samaín. La cosa paez complicase enforma más cola continuidá nueva d’a partir de 2018, porque a Laurie sal-y otra fía más, que, si queremos facer casar la fecha na que-y la quitaron asuntos sociales con na que simuló morrer en H20, habría ser madre yá na primer película, cosa que por supuestu nunca nun se menta. ¿Quiciabes tuvo una fía siendo adolescente, dexóla per ehí y dempués de que la atacara Myers recuperóla? ¡Venga!, ¿por qué non? Too seya un rebilicoque más por sostener y dexar ser la posibilidá d’una teoría tan lloca.
