Guieldu ye una banda de mocedá asturiana de música celta new-age que ta acabantes d’asoleyar el so primer cenciellu nes plataformes dixitales. Inspírense nos soníos de grupos y artistes que popularizaron el xéneru nos años 80 y 90 como Alan Stivell, Dan ar Braz, Clannad, Nightnoise o Dónal Lunny. Ta formada por: Héctor Aneiros, Celia Nieto, Susana Sors, Jorge Álvarez, Laura Méndez, Pablo Santamarta y Gabriel Catalán,
¿Guieldu? ¿Por qué esi nome pal grupu?
Ye una palabra asturiana que s’emplega na zona centro-occidental. ”Dir al guieldu” en Candamu, Pravia, Soto’l Barcu o Cuideiru ye dir pañar frutu menudo, bien seya al monte (castañes por casu) o la mar. Prestómos muncho y amás nun había naide con esi nome n’Internet.
¿Música Celta? ¿Nun ye una etiqueta pasada de moda?
Sedrálo, sí. Pero nun atopamos otra que nos defina meyor. Facemos música de raigañu, principalmente asturiana, pero tamién del restu l’arcu atlánticu européu (Galicia, Bretaña, Gales, Escocia, Irlanda…) pero ser, nun somos lo que podría entendese por un grupu de música tradicional porque amestamos batería, baxu llétricu, sintetizadores, sumamos efeutos dixitales nes producciones para crear atmósferes, entemecemos preseos y sonoridaes d’otres cultures… en definitiva, facemos lo que se conoz por música celta new-age, una etiqueta que nos define ensin complexos.
Música celta, que non música los celtes, dicís…
Esi ye otru cantar; naide sabe a ciencia cierta qué música facíen los pueblos celtes anque heba evidencies arqueolóxiques de dellos instrumentos rudimentarios. La música tradicional que güei día podemos sentir nun hai de vela como música ancestral, nun son melodíes milenaries. L’acordión inventóse sobro l’añu 1830 en Francia, el vigulín, daqué más antiguu, fue cosa los italianos del sieglu XVI. La música siempres trespasó fronteres; la gaita que güei venceyamos automaticamente con Asturies, Galicia o Escocia paez ser que vieno d’Asia y bien pudieron traela los romanos. La suerte ye qu’equí sobrevivió hasta güei. El primer bouzouki irlandés ye d’anteayeri, como quien diz. Fízose en 1970 basáu nel instrumentu orixinal griegu. Les polkes, tan populares n’Irlanda, xurdieron en Bohemia nel sieglu XIX, nada de too esto tien que ver directamente colos pueblos celtes primitivos.
Los celtes tampoco nun entendíen de sintetizadores y samplers…
[Rises] La música celta hai de vela, o polo menos ye asina como la vemos nós, non como un concéutu hestóricu-científicu sinón a cencielles como lo que ye, un ampliu xéneru musical actual que, eso sí, tien un nexu común, que son les músiques tradicionales de la mariña occidental europea, de los “finisterres” d’Europa. Pueblos que pola so proximidá caltuvieron y caltuvimos sieglos de rellaciones sociales, comerciales y culturales. Ye normal asina que compartamos dances paecíes, tradiciones y fiestes, qu’eses sí, incluso pueden tener oríxenes milenarios, pero nun tienen que ver cola música celta como estilu modernu.
“Cuando-y metemos otres sonoridaes, otros instrumentos, creamos colos teclaos eses atmósferes (bucóliques, misterioses, épiques…), etc. entos tamos faciendo “música celta” como la que fizo Hevia nos sos primeros trabayos o faen Carlos Nuñez, Dan ar Braz, Loreena McKennitt y Connie Dover”
¿Ye más una etiqueta comercial entós?
Tolos xéneros actuales pueden entendese como etiquetes comerciales, non solo la música celta. Dende’l Rock & Roll hasta’l Hip-Hop, inclusive “balfolk”,”neofolk”, “pagan folk” o “folktronic” son etiquetes inventaes por daquién pa identificar singularmente un xéneru o estilu de manera prestosa y xenerar atención nel públicu.
Determinada música folk entamose a llamar “Música celta” nos años 70 col bretón Alan Stivell y estendióse’l nome per Irlanda, Escocia… llegando a Galicia y Asturies. Tamién saltó’l charcu a América y fízose mundial col boom de los 90. Pa un estadounidense sedrá “música celta” cualesquier tradicional que-y recuerde a Escocia ya’l restu “naciones celtes”, pero una gaitera galega o un pandereteru asturianu ye perfeutamente llóxico que nun se vea reflexáu con esa etiqueta na so propia tierra, porque fae música puramente tradicional, nun ye otru el so estilu. Agora bien, cuando, como ye’l nuesu casu, metémos-y otres sonoridaes, otros instrumentos, creamos colos teclaos eses atmósferes (bucóliques, misterioses, épiques…), etc. entos tamos faciendo “música celta” como la que fizo Hevia nos sos primeros trabayos o faen Carlos Nuñez, Dan ar Braz, Loreena McKennitt y Connie Dover, salvando les distancies claro.
¿Son esos los vuestros referentes? Carlos Núñez, Hevia, Alan Stivell, Dan ar Braz, Loreena McKennitt…?¿Clannad tamién?
Clannad sobre manera, y dellos más: Balandrán, Beleño, N’Arba y Xera n’Asturies, Luar na Lubre en Galiza, y llueu Wolfstone, Silly Wizard, Capercaillie, Nightnoise, Altan, Secret Garden, Davy Spillane, Gilles Servat…
Balandrán… Yeren d’Avilés, como vós…
Sí, fue un grupu llocal nos años 90 que metía tamién soníos new-age y amestaba música asturiana cola irlandesa ya otras. Nun son de los más conocíos pesie a la so calidá. N’Avilés siempres hebo enforma movimientu de grupos “celtes” (pa entendenos). Ehí tuvieron Xéliba o los pioneros del xéneru equí nel país, que foron Trasgu. Anque nós ensayamos agora en Riolapriedra (Blimea), tenemos a bien que xurdiéremos n’Avilés, pa mantener esa tradición.
¿Qué opinión tenéis de la música folk asturiana de güei?
“Quien venimos detrás tenemos bonos faros que nos guíen, y la cosa ye qu’intentemos tamién aportar diversidá”
El panorama ye esperanzador. De va un tiempu p’acá ye verdá que tán xurdiendo nueves bandes bien prestoses con xente mozo de la nuesa quinta: Abéu, Draque, Algaire… Esto yera daqué necesario porque veníemos d’una epoca de ciertu estancamientu onde xurdíen bandes pero obligaes a compartir la mayoría músicos ente elles. Eso sí, gracies a ellos, a xente tan produtiva y mayestra no suyo como Rubén Banda, Pepín de Muñalén o Ruma Barbero y otres, la música asturiana de raigañu caltúvose viva y sigue palantre con niveles de calidad superior. Quien venimos detrás tenemos bonos faros que nos guíen, y la cosa ye qu’intentemos tamién aportar diversidá.
Falemos del vuesu cenciellu. ¿Qué ye lo que vamos escuchar si entramos en Spotify?
En Spotify y n’otres plataformes dixitales vais atopar el nuesu primer trabayu, un single tituláu “L’Aremu” y que tien dos temes (como enantes llevaben los discos pequeños de 45 rpm). El primeru y que-y da titulu ye “L’Aremu”, una danza antigua tradicional de la montaña central asturiana del conceyu Quirós que recuperó de la memoria oral Xosé Ambas y que xuntamos a otra pieza tradicional perguapa que se llama “Diana de La Sobarriba”, de Llión. Irish Fleadh ye la segunda tema’l single, un set de tres reels tradicionales irlandeses fechos nun xeitu casi “folk-rock” tan propiu de la dómina los 90 que recuerden a esos duelos de “fiddle” de los shows de “Lord of the Dance” o “Feet of Flames” de Ronan Hardiman o a los canadienses Leahy. Namás tenéis que buscar Guieldu na plataforma de música que seya p’atopalos.
“Hai xente abondo que diz que-yos gustamos enforma y eso ayúdanos muncho a siguir p’alantre. Tamién hai dalguna crítica por salinos de lo tradicional que vien de xente con un pensamientu purista de la tradición”
¿Que tal les crítiques?
Muy buenes en xeneral. Tamién ye verdá qu’echamos en falta figures como la d’Aurelio Argel (fináu en 2018) que podíen danos una opinión con munchu criteriu. Hai xente abondo que diz que-yos gustamos enforma y eso ayúdanos muncho a siguir p’alantre. Tamién hai dalguna crítica por salinos de lo tradicional que vien de xente con un pensamientu purista de la tradición. Equí siempre dicimos que les maneres d’entender la música son variaes y toes válides. Facer de daqué dalgo intocable nun ye más qu’una manera de facer que desapaeza. Por eso nós vemos bien dende la fusión col blues de L-R hasta la llectrónica de Ḷḷercia y Llevólu’l Sumiciu. Meter, como nós metemos, samples dixitales o tener un estilu pa cola flauta hiper-adornau, nun ye facer nada mal, ye facelo diferente, con estilu propiu que ye lo que presta, llueu puede gustar más o menos, cosa mui respetable. Si quixéremos facer música p’agradar a muncha xente, tocaríemos reguetón.
¿Y cuándo podremos sentívos en direutu?
Nunes selmanes vamos tener llistu un repertoriu mui curiosu y yá contautaron con nós dellos promotores interesaos en que Guieldu tea nun par de festivales. La nuesa idea ye principiar a tocar en vivu a finales de la primavera o entamos del branu, pa preparar bien el repertoriu n’estos meses qu’entren y tener tamién polo menos otru cenciellu publicáu. Amás, ta la cosa de ser un grupu de munchos componentes con mucha parafernalia pa lo que s’estila, que nun cabemos con tou según en qué escenariu. Eso llimítanos un poco, asina que nun vais venos dar conciertos a tutiplén pa desgracia los nuesos bolsiellos [rises]. Eso sí, caún sedrá’l doble d’especial, por esclusivu.
