Guillermo del Toro tien dicho, n’entrevistes, que si de dalgo s’arrepiente ye de nun aceutar, cuándo-y lo ufrieron en 2007, facese cargu del Dark Universe. Si nun vos suena, si nun sabéis qué yera eso, ye normal. Yera’l plan que tenía Universal pa revilvar los sos monstruos clásicos, y que, tres dos intentos fallíos (Dracula Untold en 2014 y The Mummy en 2017), la productora acabó dexando pa prau. La versión de The Invisible Man de 2020 foi la prueba d’ello, pos al nun saber qué facer coles franquicies acabaron cediendo esta a Blumhouse.
El casu ye que’l direutor mexicanu quedó cola espinina clavada, y como los más de los personaxes, al cabu y al cantu, tán llibres de drechos, tien la idea de facelo de toles maneres, anque nun seya con Universal. Asina, teniendo en cuenta que The Shape of Water ye yá una versión (bastante llibre) de Creature from the Black Lagoon, la versión de Frankenstein que ta tresnando pa Netflix sedría la so segunda película al respeutive. Rúxese, sobre ella, que tien falao con Oscar Isaac (Moon Knight), Andrew Garfield (The Amazing Spider-Man) y Mia Goth (X) pa que la protagonicen, anque nengún d’ellos ta confirmáu como actor. La verdá que se sabe poco de la película, nin siquiera la fecha na que s’espera estrenala, pero’l casu ye que ta de camín, lo que nun ye poco cuando munches de les obres que supuestamente diba facer del Toro (Tarzan, At the Mountains of Madness, Justice League Dark) llamentablemente acabaron quedando en nada.
Sobre proyeutos futuros rellacionaos con esti universu nun sabemos tampoco muncho. Sí que, de pasada, el direutor mentó otros monstruos: L’Home Llobu, L’Home Invisible, La Novia de Frankenstein (anque esta última sí tendría drechos, y la versión habría ser tan llibre como la de la Creatura de la Llaguna Negra). Otros posibles que nun mentó son Drácula, el Doctor Jekyll y Mister Hyde, La Pantasma de la Ópera, La Momia… La verdá qu’hai milenta posibilidaes. ¿Cuála sedrá la viniente? De momentu va haber que conformase con Frankenstein, pero nun sedría raro que tuviéremos más noticies pronto.
