Según una noticia que desvelen medios como’l portal Above the Line (noticia orixinal que pues lleer calcando equí), los estudios de Hollywood lleven tiempu pensando en sustituyir a los guionistes, o pelo menos la parte más importante del so trabayu, por intelixencies artificiales qu’escriban hestories basaes n’obres (noveles, guiones de películes antigües…) llibres de drechos d’autor. Agora, cola fuelga de guionistes, con reclamaciones como precisamente nun permitir l’usu de les IAs pa facer guiones, la cosa paez tar acelerándose, y la idea que tienen en Hollywood sedría dir produciendo estos guiones pa, n’acabando la protesta, contratar escritores qu’igüen lo que seya que salga de la máquina y lo conviertan en coses potables. Joe Russo, direutor de Captain America: The Winter Soldier, Avengers: Infinity War y Avengers: Endgame ye ún de los que yá mostró en público el so sofitu a esta teunoloxía nueva, tanto pa escribir como pa facer les películes, pos sedría a detectar qué ye lo que quieren los espectadores y dá-yoslo, como podría ser una película protagonizada por una Marilyn Monroe “resucitada”. Yá de a tiempu s’usen intelixencies artificiales pa facer efeutos especiales, como pue ser amozar a un actor nuna escena de flashback, pero la cosa pinta que va dir muncho más allá.
Les implicaciones étiques de too ello nun son poques, por más que nun utilicen na base de datos obres con drechos d’autor y imaxinando qu’estes intelixencies seya a sustituyir a los humanos con obres de la mesma calidá. Per un llau, no tocante a los guionistes pero tamién a otres profesiones, polos puestos de trabayu que pue quitar; y per otru, polo discutible de práutiques como usar muertos como actores pa facer de reclamu, por más que se compren los sos drechos d’imaxe a los herederos.
Por embargu, ye evidente que les máquines cuesten menos, y que tampoco nun faen fuelga como los trabayadores humanos, polo qu’el desendolcu d’esta teunoloxía y los procedimientos que conlleva paecen imparables tamién na industria cinematográfica. ¿Ónde nos va llevar esto? La verdá que les más de les películes de ciencia-ficción nun presaxen nada bono.
