Va añu y mediu entrevistábemos a Hector Lasheras, el responsable de la CometCon. Daquella tábemos acabantes recibir la noticia de que’l festival dexaba Uviéu pa dir a implantase en Xixón, onde les autoridaes llocales teníen daqué más de sensibilidá pa con ellos. Agora, cola primer edición xixonesa de la CometCon acabada, facemos balance de lo que pasó.
¿Qué balance faes d’esta primer CometCon en Xixón?
Creo que foi un éxitu completu. Teníemos duldes, porque había qu’afrontar el cambéu de ciudá, d’allugamientu y un añu de seca nel que nun pudimos facer CometCon como davezu por mor del Covid. Esos factores sumaos a la situación sanitaria facíennos pensar nuna asistencia alredor d’unes 10.000 persones, pero superar les 16.000 asítianos nes mesmes cifres pre-pandemia, lo qu’amuesa que tamos faciendo daqué bien pa tener un públicu tan fiel y entregáu.
Ye la segunda CometCon que se desendolca en plenu andanciu del COVID-16. ¿Foi meyor o peor que l’anterior?
Creo que nun tienen nada que ver. La edición 2020 fíxose en dellos edificios municipales y privaos, intentamos fornir una ufierta cultural atractiva y duplicala de 3 a 6 díes en dos fines de selmana, pero teníen un enfoque de xornaes culturales más que d’eventu. Pela so parte 2021, sí que foi una feria en condiciones, colo qu’eso implica y s’espera d’ella. Personalmente anque 2020 foi una edición bien guapa, cálida y afayadiza, CometCon ye lo que vimos en 2021.
En términos d’ingresos y de visites… ¿Tamos a los niveles de primero de l’andanciu o tovía queda pa llegar ehí?
R: No qu’a CometCon se refier tamos en niveles previos a la pandemia totalmente. Falamos de que, sumando tiendes, artesanos, asociaciones y personal superamos les 17.000 persones. Tamién tuvimos una bona respuesta per parte de la hotelería, tiendes y artesanos con unos niveles de venta dalgo más moderaos qu’en 2019 pero bonos igualmente.
Ye verdá que fuimos al 50% y el sábadu munches persones nun pudieron entrar, pero tamos raspiando’l techu ensin duldes.
¿Qué foi lo más llamativo o lo más exitoso d’esta CometCon?
¡Facela! (rises). Pos destacaría 4 cuestiones que mos lleguen per parte del públicu. La primera, el cambéu de recintu viose perpositivo pola amplitú, los espacios verdes y la manera d’organizalo. La segunda, como siempre, el concursu de cosplay que nun deceiciona, amás de les esposiciones escala 1:1 que traximos que nun dexaron a naide indiferente. Finalmente hai que destacar que tuvimos cero problemes nel eventu, tol mundu tenía’l so embozu, respetaba les coles y yera comprensivu de la que los aforos taben llenos.
Imaxinamos que l’enfotu que tenéis dende la organización ye dir medrando y faciendo que la CometCon l’añu qu’entra seya tovía meyor qu’ésti. ¿Qué vos gustaría tener na próxima CometCon? ¿Cuálos son los planes de futuru?
Lóxicamente siempre trabayamos p’ameyorar, medrar n’espaciu o en conteníos y ufiertar cada añu una edición si nun ye meyor, polo menos distinta. Esa ye la esencia d’estos eventos, tar coneutando cultura y lo que “pega” en cada momentu. Llevamos bien d’años tratando d’atrayer empreses del seutor del videoxuegu potentes, pero ye enforma complicao n’Asturies.
Una de les apuestes más interesantes d’esta CometCon foi l’usu del asturianu en tola cartelería qu’indicaba les distintes sales, salones etc… ¿Cómo acoyó’l públicu esto?
Creo que la meyor acoyida ye la normalidá. Naide dixo nada nin comentó nada nes redes sociales, lo que da prueba de que la normalización de la llingua asturiana pasa, precisamente por esto, normalizala. Nosotros, qu’organizamos actividaes y eventos en Galicia o Barcelona, si bien ellí son oficiales, en nengún momentu se cuestiona o entruga por que un cartel ta en gallegu o catalán, nin se puntúa más o menos por facer un proyeutu nesa llingua. Ta normalizao.
Tamién apostastis por facer meses de debate con autores asturianos de fantasía, terror y ciencia ficción o agospiar la primera presentación pública de “Tiempu de Lleendes”, el primer videoxuegu n’asturianu. ¿Vais siguir nesa llinia pa próximes ediciones? ¿Cómo foi l’acoyida?
L’éxitu del eventu ta n’enllazar autores y creadores asturianos, munchos y bonos, pero quiciabes desocnocíos, colos nacionales. Esto permítenos crear sinerxíes a tolos niveles, como dicía’l Direutor Xeneral de Cultura, Pablo León, somos un eventu “‘dAsturies p’Asturies” y Asturies ha tener representación ensin dulda. Personalmente creyo que l’acoyida foi bien bona, enllenando les actividaes propuestes.
¿Cuál ye’l rol de les alministraciones llocal, autonómica y estatal na CometCon? ¿Sofitaron la iniciativa? ¿Cómo?
RA nivel llocal Xixón ye’l nuesu primer y más importante valedor. Concretamente Divertia y Impulsa, ensin les que puedo asegurate que nun habría CometCon. Ye prestoso trabayar con ellos, pos tienes tratu direutu y pues dialogar de tu a tu. La barrera ente ciudadanía y alministración desapaez con un equipu humanu maraviyosu. A nivel autonómicu cuntamos col sofitu de la Conseyería de Cultura per aciu de les sovenciones competitives que sacaron, si bien ye l’alministración que menos aporta y, anguaño, siguimos pendientes de la resolución al igual que n’Innovación. Ye un problema que manifesté bien de veces, nun ye cuestión d’importes y pagos, sinón de feches, tamos en setiembre, yá acabó práuticamente l’añu y entá nun sabemos nada. Finalmente, esti ye”l primer añu que tenemos sofitu a nivel estatal, foi una sorpresa agradable que pon de manifiestu la relevancia que ta teniendo l’eventu.
Tamién hai que destacar la presencia de toos ellos nes visites institucionales y ruedes de prensa, amás de la Universidá d’Uviéu, que diba prestanos sumar a los nuesos collaboradores yá que xeneramos un conteníu que pue atrayer y crear complicidaes coles sos titulaciones d’informática y realidá virtual, amás d’impresión 3D.
CometCon, Celsius 232… ¿Tien Asturies un potencial friqui mayor que’l de les demás comunidaes autónomes? ¿Cómo valores la “escena friqui” d’Asturies?
En verdá non. Ye verdá que tenemos munchos festivales y de muncha calidá, pero eso nun implica que tengamos más potencial. Al contrario. Galicia y País Vascu tienen munchísimu más que nosotros y eso ensin valorar Madrid o Barcelona, que tampoco diba ser xusto facer la comparativa. Asturies tien poca población y menos tovía población mozo, polo qu’en verdá ye muncho más difícil sacar iniciatives asina. Creyo qu’Asturies habría apostar por un gran eventu qu’axuntare too esto, pudiendo ser la CometCon esa plataforma, pero fai falta vitaminala, entendela y conocela pa ver tolo que pue llegar a ser.
¿Descártase pa siempre la posibilidá de volver a Uviéu?
Nosotros nunca descartamos nada, son los demás los que mos descataren. Tenemos un eventu, con un formatu, un volume de públicu y un impautu qu’hai que saber valorar na so xusta midida. Cada ciudá, fai balance d’ello nel so llibre exercicu d’apostar polo que ye meyor o peor pa la so ciudadanía. Agora bien, depués hai que ser consecuente a la hora de falar de cultura y valorar ¿qué cultura y pa quién? Siempre dixi que la cultura nun ta reñida, y tien cabida too, de la ópera al fútbol y ye deber de les instituciones públiques facer por espardeles y ufiertar ociu pa tolos públicos.
