¿Cultura pulp, friki, ociu alternativu… ? ¿Cómo describiríes a la CometCon y por qué?
Col pasu los años maduré y perfilé la mio definición de CometCon. Del mesmu mou que l’eventu maureció col tiempu, a lo primero yera una actividá un poco grande qu’axuntaba gustos distintos, pero eso va yá pa 9 años. Agora CometCon pa min ye un eventu de referencia n’Asturies, pola so visión, pola so manera de facer les coses, pola so forma d’ocupase de la mocedá, l’ociu y la cultura.
En definitiva, diría que CometCon anguaño ye un espaciu y una galería porque axunta a miles de persones distintes, cientos d’actividaes tovía más distintes y ufierta per 3 díes actividaes que nun hai n’Asturies.
¿Qué novedaes tien esti añu?
Pos esti añu paezme que lo más importante y que fuimos a facer un eventu d’eventos. Escoyimos coses que yá funcionaben o que facíemos ayuri como puen ser Aprendev, CometMaker, Los Premios Nacionales del Doblaxe Retake, les Survival Zombie y los conciertos sinfónicos de Filmmusic y axuntámoslos toos al más que conocíu CometCon.
Esto permítenos ufiertar 6 eventos dientro d’ún, colo qu’implica en términos d’ociu, cultura y innovación.
¿Cuálos son los eventos o autores que más públicu atraen?
Nun hai duldes de que’l Cosplay sigue siendo’l rei de les actividaes y ye la columna vertebral del eventu. Esti añu naguamos por que la final del Circuitu Tormenta del Leage of Legends seya un reclamu pal públicu gamer amás de la gala Retake y los conciertos sinfónicos de música de videoxuegos.
Amás, sumándo-y a esto fichaxes de primera llinia como La Cocina del Pirata, Caravaca & Grison, Antonio Villarán, La Gata de Schödinger y los Cosplayer internacionales pente munchos otros, naguamos por que seyan un reclamu pa esta edición de 2020.
Una de les novedaes d’esi añu ye’l fechu de que la CometCon dexa Uviéu pa dir a instalase en Xixón. ¿Cuál foi’l problema y cómo vos acoyó la ciudá de Xixón?
Col cambiu de Gobiernu tanto PP como Ciudadanos, col sofitu d’OTEA decidieron que CometCon nun-yos interesaba y queríen más nun mos tener. Anque apurrímos-ys datos d’impautu económicu pa desmentir les acusaciones del lobby OTEA (tovía tamos esperando poles d’ellos) taba nidio qu’un eventu enfocáu na mocedá, la cultura y l’ociu, nun-yos prestaba.
Por eso pretendíen afoganos económicamente, exemplu d’eso ye que la convocatoria de sovenciones a la que mos convidaron a participar acababa’l 20 d’abril (el plazu de solicitúes) polo que yera imposible organizar l’eventu (a últimos de marzu). Anque aceutemos un recorte del 50% del presupuestu, pos el Principáu d’Asturies amosaba’l so sofitu n’Uviéu, el recorte final yera del 100% lo que facía inviable un eventu que n’Uviéu mancábenlu yá abondo les torgues alministratives.
Dicho esto, énte la intención clara de borranos del mapa, fuimos a Xixón a presentar el nuesu proyeutu y si nun recuerdo mal, a la selmana teníemos yá un corréu comprometiéndose a ayudanos y a sacar l’eventu alantre. Daquella nun teníemos nin cifres delantre de la mesa, pero aceutamos a ciegues cola seguranza de que Xixón diba apreciar el nuesu trabayu, ensin dulda, a 3 de marzu foi d’esti mou y nun mos arrepentimos nada.
Paez que mientres que Xixón tien tolos festivales lliterarios y culturales dende’l Celsius a la Semana Negra y agora suma la CometCon, n’Uviéu namás queden la ópera y la zarzuela: ¿Hai esperanza de qu’Uviéu tenga vida cultural en dalgún momentu? ¿Por qué pienses qu’una ciudá d’esta categoría nun tien una política cultural que mereza esi nome?
Bono, a min la ópera, el teatru y les actividaes qu’hai gústenme, esto nun ye una dicotomía ó nós o la ópera, a la capital del Principáu presuponíase-y capacidá abondo p’axuntar una ufierta de cultura y ociu pa tolos públicos. Dende congresos de medicina, pasando per cites gastronómiques hasta nosotros o otros eventos. El problema nun ta nos eventos que se faigan, sinón nos favores y les hipoteques qu’arrastra la clas política gobernante d’Uviéu.
Dicho esto, el día en que la clas política entienda que les propuestes, pol fechu de ser de la oposición, nun hai que les refugar, y entamen a analizales toes con criterios oxetivos y curiando pol interés de tola ciudadanía, non namás d’unos pocos, vamos consiguir tener una ciudá plural onde heba espaciu pa la ópera y los conciertos underground.
¿Cómo ye la implicación de los medios de comunicación asturianos; periódicos y televisión autonómica na CometCon? ¿Consideráis la posibilidá de, en dalgún momentu, facer un programa especial como yá pasa con otros eventos de menor interés popular y implicación pública como, por exemplu, los Premios Princesa, que gocien d’ello amás de desconexones y direutos?
Nós cola prensa tamos encantaos, tenemos bon tratu, unviamos información, pídennos entrevistes, cubren l’eventu y hasta dalgún mediu ye collaborador direutu. Tocante a la otra entruga, a nós la TPA fainos yá conexones en direuto y hasta agora nengún mediu negóse a venir, a cubrir daqué o dexó de contestanos. Ta claro que los Premios Princesa son relevantes pa la ciudá d’Uviéu, otra vuelta pienso qu’hai espaciu pa too y que los convidaos de los Premios, que son lo principal, ponen de relieve a Uviéu, del mesmu mou que facemos nós, hai sitiu pa toos.
¿Cuál pienses que ye l’impautu económicu de la CometCon n’Asturies? ¿Tenéis forma de cuantificalo?
Va tiempu dimos datos al respeutive. Hai una parte cuantificable que nós sabemos, no que cinca a los puestos comerciales, artesanales, ventes nel eventu, ocupación hotelera… etc. Tamién ye verdá qu’hai otra parte que non, la parte de los tresportes en vehículos privaos, el consumu fuera l’eventu, etc. Ta claro que 17.000 persones que s’axunten n’Uviéu diben de folixa, comíen, bebíen y mercaben nel eventu. El meyor indicador ye que la ufierta de tiendes sigue con una demanda altísima, anque tean alloñaos xeográficamente del restu d’eventos.
¿Y culturalmente? ¿Podemos falar d’una Asturies pre y post CometCon en términos culturales?
Nun sé si tanto, pero la realidá ye que, hasta qu’apaeció CometCon, n’Asturies hebo dellos intentos a menor escala de facer esti tipu de convenciones, pero nun foi CometCon la qu’asentó y dio forma al modelu de les “comic con” adautáu a les necesidaes y demandes d’Asturies. Otra vuelta son yá 8 ediciones nes que punximos el cartel de “lleno”, esto quier dicir que CometCon sacó una cultura que, anque tapecida, taba ehí en toa Asturies.
La CometCon ye un referente d’un tipu de cultura mui determináu non solo n’Asturies sinón tamién n’España. ¿Cuála ye la presencia de los artistes asturianos dientro d’ella? ¿Paezte que se podría facer más?
Pos la verdá ye que sí, y somos los primeros en llamentar nun ser quién a llegar a más. Tolos años tratamos de mou tresvesarl contar con atuores, estudios indie y artesanos d’Asturies. Por eso, por ponete un exemplu, primamos les solicitúes d’artesanos llocales sobre nacionales, anque esto pudiera damos más visibilidá. Tamién ye verdá qu’hai que caltener un equilibriu ente trayer a cabeces de cartel y otros autores, pos CometCon nun dexa de tener un públicu que demanda escritores, youtubers y famosos de sonadía.
Dicho esto, tolos años contamos con autores asturianos como Iván de capitán Eclipse, Rodrigo Cuevas o SrSerpiente, youtuber asturianu, pente bien d’otros. Ta claro que diba prestame tener un añu tranquilu nel que poder centrame nel eventu n’esclusiva y non en que mos echen d’Uviéu y d’esti mou poder contar con más autores o informame meyor del conteníu cultural que tenemos n’Asturies, que tien cantera ensin duldes.
Una de les novedaes más positives de la CometCon del añu pasáu foi’l fechu d’entamar a emplegar l’asturianu. Sicasí, la web tovía nun ta billingüe nin tampoco entraes, cartelos y demás… ¿Cuándo podremos tener una CometCon 100% billingüe?
Efeutivamente, l’añu pasáu intentemos facer que l’eventu fore billingüe pa visibilizar l’asturianu, pero atopamos un problema principal, que ye económicu. Díbemos precisar d’una persona que s’encargare de tornalo too, supiere de web, diseños pa duplicar tola información, sinceramente taríemos encantaos si dalgún organismu quixere collaborar con esi llabor, si queda nun va ser por nós. Axallá qu’en 2021 teamos bien asentaos en Xixón y podamos dedica-y tiempu a tornar tola información del eventu.
¿Qué-y diríes a una persona que nun conoz la CometCon pa que viniere?
¡Que venga a conocela!
