Apple TV+ sorpriende con esta serie nueva de ficción científica, o que más bien podría denomase asina nos yá alloñaos años cincuenta del sieglu XX. Y ye que la estética, la ciencia y la sociedá que nos presenta son d’aquello que podríemos llamar ucrónico, atompunk si nos ponemos esquisitos; el futuru talamente como lu víen los norteamericanos unos pocos años dempués de la Segunda Guerra Mundial, cuando paecía que l’ascensu de la clase media y l’usu de la enerxía atómico diben llevar a una gran yera pa la humanidá… o, pelo menos, pa la sociedá de consumu norteamericana.
Coches flotantes, robós camareros d’estilu art decó, traxes con un aire a los de The Jetsons y máquines d’escribir al dictáu que t’aforren secretaria. Dalgo asina, por si nun tais familiarizaos cola ambientación, colo que yera’l mundu de Fallout primero de que les bombes nucleares lo volaren too pelos aires. Y asina, con una envolvedura d’utopía que queda namás neso, la serie nueva somorguiámonos na vida d’unos viaxantes, comerciales qu’anden de pueblu en pueblu vendiendo cases na lluna. Y si digo que queda n’envolvedura ye porque ensiguida queda claro que tamos énte una hestoria bien mundana, con personaxes tan miserables y pininos como los del mundu real que tenemos al otru llau de la ventana; hai ludópates, infieles, multes, demencia senil, errores frustantes per parte de les máquines y toes aquelles coses que nes utopíes presta más dexar pa prau. El protagonista, por casu (interpretáu por Billy Cudrup), ye un caradura con un fíu qu’abandonó va tanto que nin siquiera lu recuerda, y yá dende’l principiu podemos goler qu’hai dalgo turbio colos xalés llunares que toos ellos tenten de vender… El llugar al que la xente suaña con dir pa escapar de los sos problemes.
La serie, de la que de momentu salieron namás trés episodios, crea un mundu perinteresante del que la verdá qu’apetez ver más, sobre manera porque tien munchu potencial y nun queda claro pa ónde van empobinar la hestoria. Lo que ta claro ye que tamos énte un productu orixinal, y eso ye raro d’atopar anguaño.
Si queréis saber más, podéis echar una güeyada col avance que vos dexamos calcando equí.
