Nun tenía munches esperances puestes na película nueva de Hellraiser, pos ye yá la… ¿oncena? y dende que salieron les dos primeres namás que tien habío unos destellinos de brillantez. Les últimes yeren serie B, directes pa televisión (non precisamente como bombazos pa canales de streaming) y la verdá qu’hubo dalguna que nin aguanté entera, por más que me paeza atrayible la idea qu’hai de fondu nelles.
Por si nun lo sabéis, la saga ta basada nuna novela de Clive Barker, maestru del horror qu’igual pasa un poco desapercibido per equí, pero que ye autor d’otres obres qu’acabaron convirtiéndose en películes de les que dalguna veríeis, como son Candyman, Books of Blood, Nightbreed o Lord of Illusions, esta última dirixida por él mesmu. Tien un estilu que pelo menos pue llamase atrevíu, con un entemez d’acción, gore y erotismu que pue, bien encantate o bien desagradate enforma, pero ye difícil que te dexe indiferente.
Hellraiser ye una bona representación non yá de los sos escritos, sinón que’l so estilu s’encarna nes creatures que creó pa la obra, los “cenobites”. Son una especie de, llamémoslos, dioses del sado (pa dalgunos ánxeles, pa dalgunos demoños) que te lleven a la so dimensión pa “enseñate les llendes de la carne”, produciéndote sensaciones que prometen úniques… claro, van torturate hasta onde la mente humana nun ye a imaxinar. Acordies con ello, tienen un aspectu que resulta tan horrible como estéticu, y que fizo historia nel diseñu de monstruos, produciendo milenta influyencies. Ye, ta claro, una idea en sí mesma potentísima, y que pue usase pa contar abondes hestories mui distintes. Pueque seya esto lo que fizo que, adulces, la saga fuera perdiendo’l norte.
El casu ye que, agora, el conglomeráu del imperiu Disney (produciéndola Fox, echándola Hulu) quixo da-y aires nuevos a la saga, y la verdá que nun lo fizo dafechu mal. Encántame, personalmente, la fidelidá estética de los efeutos especiales, masque actualizaos, con tou aquel mundu tresdimensional de cadenes, mazmorres y llaberintos; y tamién ta mui consiguíu’l diseñu de los cenobites, nos que cambien los traxes de cueru prieto por pelleyu humano, pero’l fan sigue reconociendo los clásicos ensin problema (caún ta esformáu d’una manera única). Per otru llau, el funcionamientu de la caxa qu’abre la puerta al otru mundu ye bien distintu a la de les anteriores histories, lo que dificulta que podamos considerar esta película una continuación, pero sí ye verdá que permite desendolcar trames que nun teníemos visto hasta agora.
Si dalgo he dicir malo, son dos coses. La primera, y más grave a nivel conceptual, ye que se pierde esa idea de que, nel mundu de los cenobites, por espantible que nos paeza, hai un puntu nel que nun s’estrema’l dolor estremu del placer, colo que queden ensin esi cercu que-yos da un carís más espantoso, que fai que dellos los vean como ánxeles. Per otru, más grave a nivel argumental, ye que la película tira de clixés d’una manera que resulta bastante evidente cómo van resultar delles trames namás que s’abren.
Por embargu, ye una película que paga la pena ver si yes fan de les dos primeres, anque nun tengo claro que, precisamente por ser fiel a la estética de la saga, que ye lo que más presta, vaya alcontrar pie nes xeneraciones nueves.
