La llegada de James Gunn a DC Studios ta poniendo too pates p’arriba, y como anunciábemos va unos díes que Wonder Woman quedaba colgada ensin una tercer parte, agora resulta que los rumores sobre Superman son tamién ciertos y anularon Man of Steel 2, magar que va nada que presentaron un look nuevu de Henry Cavill na escena poscreitos de Black Adam. Y ye qu’eso ye otru matu, porque acusen a The Rock d’esparder una noticia falsa sobre que la so película fora un ésitu, mientres que dende Warner calculen que la perda que-yos va producir ye d’ente cincuenta y cien millones de dólares. Y énte panorama talu, a lo que se sumen los continuos escándalos d’Ezra Miller enantes d’estrenar The Flash, el recorte de les escenes d’Amber Heard n’Aquaman 3 y los rumores nuevos de que Jason Momoa podría dexar el papel del superhéroe atlante pa facer de Lobo, too apunta a que l’Universu Espandíu DC ta firíu de muerte.
De momentu, James Gunn ta trabayando nuna película que paez ser que reinicia la hestoria de Superman con otru actor protagonista, centrada nos sos primeros años como superhéroe, lo que podría casar con The Batman pa empezar de nueves un universu en comuña. O dir per otru llau, quién sabe, porque tamién ta en marcha, yá rodándose, Joker: Folie à Deux, la segunda parte del Joker de Joaquín Phoenix y que nun comparte continuidá col Batman novatu de Pattinson.
Lo único que ta claro ye que que ye too un matu tremendu, y que les coses tán tan mal que yá abulta que solo puen dir a meyor. Siguimos informando.
