Don Pelayu, La Santina (anque seya un ser divinu que poco o nada tien que ver con Asturies), Fernando Alonso… Estos suelen ser les rempuestes más comunes a la entruga “¿Qué asturianos famosos conoz?” y si hai suerte dalguna persona equí y allá nomará a Xovellanos, Rafael del Riegu o a Severo Ochoa, pero munches personalidaes que ficieron grandes coses por esti país cantábricu o que llucharon por él escontra los vientos del destín queden somorguiaos na llamuerga del escaezu, condergaos a que un carapiellu d’asturianistes lloren la so suerte adversa y suañen col futuru que pudo ser de trunfar les iniciatives que plantegaron. Y ye qu’equí n’Asturies tenemos la mala zuna de sacrificar la nuesa hestoria y abrazar unos mitos pre-fabricaos más alló de los nuesos cordales, mitos que tracamundien el nuesu pasáu y presenten a esta tierra como una rexón incapaz de facer coses por sí mesma y que solo sal de la cuevina na que ta apigazando pa salvar la patria. A resultes d’esto tolos personaxes que nun cuadren con esti discursu, tolos personaxes que trabayaron por Asturies y p’Asturies o que quixeron enfrentase al poder central quedaron arrequexaos nel rincón de los derrotaos de la hestoria.
Valga esti artículu como enésimu ya inútil intentu de sacalos d’esi pozu nel que s’alcuentren y colocalos nel altar gloriosu nel que merecen tar por fechu y derechu. Esti humilde xuntalletres que cree nuna tierra con voz propia pasará agora a numberar los nomes d’estos héroes escaecíos, acompañaos d’una curtia biografía y rellación de fechos. Tenga presente’l lleutor que nun tán tolos que son, anque sí son tolos que tán.
Amás, alvierto que tolos homes y muyeres qu’enuncio nacieron como mui tarde nos años caberos del sieglu XVIII, por considerar que nun ye razonable pintar como referentes a personaxes de la Edá Media o hasta anteriores, cuando Asturies, tal y como la conocemos anguaño, nun esistía. L’Asturies moderna ñaz nel sieglu XIX, asina que, sintiéndolo muncho, van quedar fuera doña Urraca, don Gonzalo Peláez o don Félix d’Agelaci, personaxes, amás, que nun teníen una idea política d’Asturies más allá de ser los sos terrenos privativos, la so propiedá, por ser grandes magnates.
Don Álvaro Flórez Estrada.
Economista y fidalgu somedán, figura perimportantísima nel planu políticu asturianu durante la primer metá del sieglu XIX. D’idees lliberales, más radicales que les de Xovellanos anque entovía intentando caltener un balance ente progresu y tradición, puxó pola modernización de la Xunta Xeneral y encabezaba, como Procurador Xeneral, la minoría lliberal del nuesu muérganu de representación.
Negándose a reconocer el poder llegal pero illexítimu de la monarquía de Xosé I foi ún de los protagonistes de la Revolución de Mayu de 1808, na que se proclama la nuesa soberanía y se da un xiru total al calter de la Xunta. Cabezaleru políticu d’Asturies dende entoncies, foi depuestu col güelpe de La Romana y a resultes d’ello acompañó a Xovellanos a Sevilla pa reclamar la restauración de les llibertaes asturianes y de la Xunta Xeneral, ensin consiguir dafechu’l so oxetivu. En 1809, amás, redactará un proyeutu de constitución que respetaba hasta ciertu puntu los drechos y l’autogobiernu particular de les provincies. Esencialmente taba esportando al restu d’España’l modelu institucional asturianu. Desgraciadamente, les Cortes nun quixeron saber nada d’él y acabaron aprobando la conocida constitución de 1812, d’un marcáu calter centralista.
Anque nun consiguiera los sos oxetivos val la pena alcordase de don Álvaro pol soberanu esfuerciu que realizó (xunto con otres personalidaes) na defensa d’Asturies y de la so “Constitución Hestórica”.
Doña María Josefa Francisca González y Suárez, Marica Andayón.
Doña María, Marica Andayón, como la llamaben entoncies, foi una de les dos muyeres (xunto con Xuaca Bobela) qu’entamaron la Revolución de Mayu de 1808 col so apellamientu a la población uvieína a arrincar el bandu del mariscal Joachim Murat, un actu de rebeldía escontra’l poder central de Madrid, qu’anque taba controláu polos franceses, yera’l poder llegal.
Al contrariu que Bobela, yera un personaxe popular, una muyer d’orixe humilde que viniera a la capital dende Andayón, nel conceyu de Les Regueres, pa rexentar una sidrería. Gozaba de gran popularidá y tola villa respetábala, hasta tal puntu que foi ella la que torgó’l fusilamientu de los afrancesaos que taben na cárcel d’Uviéu (xunto con diputaos de la Xunta y otres personalidaes) y nin siquiera los franceses tuvieron el valor de face-y nada cuando ocuparon la ciudá; nin a ella nin a les neñes del Hospiciu uvieín, que taben embaxo la so proteición. Marica Andayón destacaba, amás, por vistir con montera picona y ropes de paisanu, desafiando asina los roles de xéneru de la época.
Nun sedría una gran política o retórica, nin tuvo baxo’l so mandu fuercia militar de nengún tipu, pero nun podemos escaecer que brilló con lluz propia nesos años de guerra y que ganó a pulsu’l títulu de protagonista de la Revolución de Mayu de 1808, na qu’Asturies entró dafechu na modernidá, y pela puerta grande.
Don José Canga Argüelles.
Políticu, militar y economista, tuvo gran relevancia tamién na primer metá del sieglu XIX. La Guerra d’Independencia garrólu en Valencia, polo que nun pudo collaborar nos fechos citaos anteriormente xunto con Flórez Estrada, pero pese a too tien un puestu bien merecíu nesta llista, yá que foi el primer federal asturianu, o polo menos el primer autor n’asoleyar una obra política de calter federal, que tien por títulu: Cartas de un americano sobre las ventajas de los gobiernos republicanos federativos.
¿Cuála ye la relevancia d’ésto? Que sirvirá d’inspiración pa dos homes, Wenceslao Guisasola y Eladio Carreño, que tamién apaecen nesta llista. Canga Argüelles semó nellos el biltu del que surdiríen les sos idees y el so compromisu pa con Asturies.
Don Wenceslao Guisasola y don Eladio Carreño Valdés.
Ilustres federales asturianos de la segunda metá del sieglu XIX, son los responsables del Pautu Federal Astur-Galaicu y tamién del Proyeutu de Constitución Federal pal Estáu Asturianu, nel que se reconocía la nacionalidá asturiana, gracies a don Wenceslao, y tamién se facía referencia a la nuesa llingua llariega.
Opuestos al caciquismu y al centralismu foron tamién grandes lluchadores na defensa de los drechos d’Asturies y de los asturianos, destacando que “en vano transcurren los años en que gobiernos unitarios la despojan (a Asturies) de sus fueros y franquicias, en vano esa centralización trata de borar su peculiar modo de ser; aún conserva su lengua y sus trajes, sus usos y costumbres, y su espíritu federal se despierta en todos los actos solemnes de su honrosa historia.”1
D’Eladio Carreño llegó a dicir Pín de Pría, otru federal, que yera a él a quien Asturies-y debía les semeyes de la so llibertá. Y nun-y faltaba razón al autor llaniscu, cuando estos dos caballeros foron los adalides de la soberanía asturiana, que se proclamaba por segunda vegada dende 1808.
“Art. 1.º El Estado soberano de Asturias quiere formar parte integrante de la Federación Española, y acatará la Constitución Federal de la República Española o Ibérica y las leyes generales que emanen de ella. Reintegra su soberanía en todo aquello que no esté limitado por la Constiución Federal, y ejercerá todos los derechos que no haya delegado en el poder federal.
Art. 2.º La soberanía del Estado asturiano reside en el pueblo. […]”2
Tampoco nun dexó la hestoria qu’estos homes algamaren los sos oxetivos y el Cantón Asturianu quedó nun suañu, pero siempres quedarán nos corazones de los pocos que guardamos como oro en pañu les cenices enceses de la voluntá política asturiana.
Don Manuel Marinero y don Claudio Penzol
Integrantes del grupu castropolense El Aldeano, formen parte, xunto col siguiente personax, del pequeñu nucleu del asturianismu progresista na España de los años 30 y, a fecha de 15 de mayu de 1931, reclamaron un estatutu d’autonomía p’Asturies, tal y como ficieron en Galiza, Cataluña, Euskadi y Aragón, anque solo los tres primeros algamaren la materialización del mesmu (y Galiza nun pudo esfrutar d’él).
Na proclama rexonalista qu’espublizaron el día nomáu (y que tamién circuló como cartafueyu pa repartir ente la población) llamaben al espertar de la conciencia asturiana y a la xunión de los conceyos de la nuesa tierra na defensa de les nueses instituciones tradicionales, qu’ellos faen herederes de la revolución campesina del sieglu XII y viendo nelles un calter democráticu y popular. A partir d’esi plantegamientu faen un repasu pola hestoria d’Asturies y d’eses instituciones (conceyos, Xunta Xeneral y Diputación) y proponen la reorganización de les mesmes p’adautase meyor a los tiempos modernos.
“Formación del Estatuto.
Así como los gallegos convocaron una reunión en La Coruña para discutir la organización que debía darse Galicia, nosotros proponemos que (como en otros casos urgentes hizo Asturias) se reúna con la mayor brevedad posible una Junta General adonde asistan a proponer y discutir el Estatuto, un Procurador por cada uno de los 79 concejos asturianos, elegido por votación popular con todas las garantías, para la misión especial y exclusiva de confeccionar dicho Estatuto, según los deseos de la mayoría del Concejo.”3
Anque pasaron munchos años desque estos grandes eonaviegos apellaren a la necesidá del estatutu, a la fin, consiguímoslu, y foi tamién, en parte, gracies a ellos.
Don Emilio Robles Muñiz, Pachín de Melás.
Escritor bien conocíu pola so obra lliteraria, pero non tanto pola so implicación política nel asturianismu progresista. Verdaderamente podemos consideralu’l gran referente de l’asturianismu políticu na primer metá del sieglu XX y, polo menos pa esti humilde xuntalletres, debería tener una reconocencia igual a la que tien Castelao nel país vecín.
Almirador de Xovellanos, amante d’Asturies, defensor de los esplotaos, el foi el primeru qu’alzó la voz pa pidir lo que yera xusto: la devolución de l’autonomía asturiana, n’otres pallabres, l’estatutu d’autonomía, a día 19 d’abril de 1931, solo cinco díes depués de la proclamación de la II República. Nun artículu tituláu “Todo por Asturias”, asoleyáu nel periódicu El Carbayón, escribió:
“No es decir esto un regionalismo de “montera picona y dengue”. Eso no. Es una unión de amores y voluntades para impulsar nuestro progreso, acrecentar nuestra riqueza, y en el orden regional la constitución de una personalidad propia como la tienen otras regiones que fueron grandes como lo fue la nuestra en historia patria.
Seamos un hombre solo cuando de Asturias se trate, y pensemos desde ahora en hacer ese bien. Unidos, fuertes, seremos respetados para hacernos oír del poder naciente, que de seguro tendrá en estudio ideas regeneradoras regionales”.
Y nel mesmu periódicu, n’agostu, diría n’otru artículu nomáu “Alrededor de nuestro Estatuto”:
“Asturias es una de las regiones que, tanto por su capacidad económica, como por su historia, puede aspirar a la más amplia autonomía”.
Eterna gloria y eternu reconocimientu ye lo que merez don Emiliu, qu’entá enfermu de tuberculosis tuvo’l valor de poner la so pluma y les sos fuercies al serviciu del gobiernu republicanu llegalmente constituyíu y siguió escribiendo durante’l trescursu de la guerra, tanto artículos pa periódicos como obres dramátiques y d’otros tipos.
Pachín de Melás nun cesó nel so afán de dignificar Asturies hasta que la enfermedá consiguió acabar con él, yá prisioneru de les fuercies franquistes, pero les sos pallabres viven entá a día de güei, dándonos fuercies a tolos que, como él, nun somos más qu’amantes d’esti país cantábricu.
“Asturias, te amé cuanto pude, con cuanto amor pudo albergar mi alma. Te canté cuanto me fue posible. Mi vida artística fue consagrada a ti. Hacer más, es superior a mis fuerzas. Mi conciencia está tranquila.”4
Descanse tranquilu, don Emiliu, descanse tranquilu. Fizo vusté más que munchos qu’agora dalgunos veneren, foi un faru de l’asturianía.
1Proyecto de Constitución Federal del Estado Asturiano, pag. 111.
2Proyecto de Constitución Federal del Estado Asturiano, pag. 147.
3Regionalismo Asturiano: Textos para su Historia (*), pag. 140-142.
4 Últimes pallabres del autor.
