Siguimos nesta segunda entrega de la historia de l’aviación. Equí podéis ver la primer parte. La Segunda Guerra Mundial foi, claramente, el momentu que más emburrión-y dio a la industria de l’aviación. Los aviones, que tuvieren un papel secundariu (anque importante) na primera guerra mundial, conviértense nel centru de les estratexes na segunda guerra mundial. La Batalla d’Inglaterra, como se conoz al periodu nel que’l Reinu Xuníu aguanta en solitario los ataques del Reich Alemán n’Europa, son una serie de batalles aérees qu’enfrenten a la Luftwaffe y a la RAF en cielu inglés.
La batalla d’Inglaterra y l’entamu del Radar
La batalla, qu’entama siendo un bombardéu sistemáticu de los centros de producción británicos, bien ceo vuélvese una guerra sicolóxica escontra la población civil. Los alemanes desendolcaren los bombardeos en picáu “Stuka”, qu’amás d’efeutivos contaben con unes sirenes especiales coles que metíen-y mieu a la población. Probáronse na Guerra Civil Española y foron decisivos na matanza de Gernika. D’esti mou, los bombardeos alemanes de Londres foron una de les ferramientes más importantes a nivel sicolóxico na segunda guerra mundial. Frente a eso, el Reinu Xuníu resiste emplegando aviones qu’anque son bien capaces como’l Harrier y el Spitfire, tienen la superioridá más bien gracies al factor tecnolóxicu: Los británicos desendolquen sistemes d’escucha que podíen alertar de la llegada de los alemanes y, n’última instancia, acabaríen desendolcando’l sistema de radar.
Los portaaviones nel Pacíficu
Con too, nun foi la batalla d’Inglaterra la única na que l’aviación tuvo importancia na Segunda Guerra Mundial: Nel frente del Pacíficu les batalles aeronavales ente Xapón y Estaos xuníos llibráronse en gran midida gracies al emplegu per parte de les dos potencies de portaaviones y escuadrones d’aviones. En munches ocasiones les flotes enemigues nin siqueira yeren a vese, y atacábense y buscábense per aciu d’aviones de reconocencia y d’escuadrones de caces y bombarderos navales como los Zero. Equí, sobre manera hacia’l final de la guerra que va perdiendo’l Xapón, desendólquense tamién les táctiques de “kamikaze”, que consistíen n’estrellar aviones escontra los barcos de guerra americanos.
El desembarcu de normandía cuenta tamién con una bona cantidá de sofitu aéreu que va preparando’l terrén pa la infantería y les brigaes de tanques. Tamién nel frente del Este los rusos usen davezu los aviones, anque nesti llugar son más bien los tanques los que tienen una importancia decisiva. Hacia’l final de la guerra, distintos países acabaríen desendolcando los “jets”, un tipu d’avión que supera a los clásicos d’héliz y que tien la capacidá de viaxar más rápido que los anteriores. Amás, el radar va desendolcándose en tolos países y, al empar, los cohetes y misiles qu’inventaríen los alemanes y que recoyeríen los americanos gracies a la captura de científicos como Von Braun, ún de los personaxes clave na llegada de los americanos a la lluna. Na Guerra Fría los aviones a reaición tipu Jet desendólquense y, con ellos, tamién l’emplegu de misiles, colo que, como pasare col combate ente portaaviones, el combate ente aviones acaba siendo munches veces ensin vese direutamente unos a los otros.
Jumbos y Concordes
Paralelamente al desendolcu de l’aviación militar, l’aviación civil tamién tien un puxu importante nes décades siguientes a la Segunda Guerra Mundial. La posibilidá de viaxar n’avión abarátase y ye posible’l desplazase de mou normal y regular ente continentes. Tolos países – incluyíos los socialistes – desendolquen llinies aérees y los motores a reaición entren tamién nos aviones de pasaxeros. Nos sesenta desendólcase’l que va ser (y ye entá) ún de los símbolos de l’aviación: El Boing 747 “Jumbo”, l’avión más grande de pasaxeros hasta va poco, cuando l’A380 lu superó. Los aviones a reaición de pasaxeros conviértense na norma dende los años 70 y, hasta’l momentu, anque’l so diseñu nun cambiare muncho no estético, nun dexaron de tener más y más avances; sobre manera na informática y na automatización de los procesos.
Ún de los aviones qu’ameriten una atención especial, ye’l franco-británicu “Concorde”. Trátase del primer avión de pasaxeros que tien la capacidá de superar la velocidá del soníu, dalgo que, hasta’l momentu en que se fixo, namás foren a facer los aviones militares de combate. Esti avión, que tuvo una contrapartida soviética, el Tu-144, yera a facer el percorríu de Londres a Nueva York en namás trés hores. Sicasí, por mor de la xuba de los precios del petroleu y del accidente d’´ún d’estos aviones, esti modelu acabó esaniciándose, colo que, per primer vez en munchos años, l’aviación comercial daba un pasu p’atrás.
