Va poco la estrema derecha n’Asturies fixo una campaña – bastante ridícula – na que se comparaba al presidente d’Asturies, Adrián Barbón, con un dictador que pide obediencia. La particularidá d’esta campaña nun ye tanto lo ridícula que ye o’l fechu de llamar dictador a un rival – dalgo mui común en política – sinón, más bien, nel emplegu de la “falsa bandera”. Pero, ¿Qué ye la falsa bandera exactamente y cuándo s’emplegó? Nesti artículu vamos facer un pequeñu repasín d’ello.
La falsa bandera: Una de les primeres “Fake news” de la Historia
La espresión “falsa bandera” suel dir xunto con términos enforma bélicos como “atentáu”, “ataque” o “campaña”; y fai referencia al fechu d’atribuyir estes aiciones (en principiu negatives) a otra persona que nun ye l’autor real y a la que se quier perxudicar. Les aiciones que se faen con falsa bandera son siempre negatives, pos lo que busquen ye dañar la reputación del autor al que se les atribui (nel exemplu de la estrema derecha, el presidente Adrián Barbón); atribuyéndo-y aiciones negatives y falses (nesti casu, el fechu de que pida una obediencia y espresase en determinada llingua).
Pero l’orixe de la falsa bandera nun hai que lu buscar nin un cartel publicitariu nin nun tweet d’un perfil falsu, sinón n’alta mar. Y ello ye que los primeros ataques emplegando banderes falses fixéronlos pirates y corsarios de toa nacionalidá y condición. N’alta mar, sobre manera nel Caribe y nel Atlánticu, yera común averase a los barcos-oxetivu emplegando banderes d’un país amigu o neutral pa, en tando a una distancia afayadiza, cambiala pola bandera prieta de los pirates.
Nel agua siguió emplegándose en guerres más recientes como, por casu, la Segunda Guerra Mundial. Tán documentaes delles operaciones de falsa bandera nesa dómina, de les que destaquen la incursión de los británicos en Saint Nazaire emplegando banderes nazis nos sos barcos. Los nazis tamién fixeron paecío, al emplegar un barcu militar antroxáu de barcu civil, el Kormoran, pa fundir al cruceru llixeru australianu HMAS Sydney.
De barcos ye tamién otru episodiu mui conocíu – y alredor del qu’hai un debate importante ente los historiadores – como ye’l fundimientu del barcu militar USS Maine amarráu nel puertu de L’Habana. El fundimientu prodúxose pol españíu d’una bomba que daquién colocaría dientro. Les acusaciones de dellos historiadores españoles son de que l’atentáu foi de falsa bandera, un “auto-atentáu” fechu pa consiguir movilizar a la opinión pública nacional y internacional escontra España y xustificar asina la intervención militar en favor de los revolucionarios cubanos.
En política, a la orde del día:
En política l’emplegu de les falses banderes ta a la orde del día. Non namás la estrema derecha n’Asturies, sinón, tamién, per ayuri. Por casu, la campaña qu’emplega a Barbón nun dexa de ser una copia d’otru montaxe de la estrema derecha p’atribuyir al gobiernu d’España esi enclín dictatorial.
Otru de los usos de los ataques de falsa bandera vémoslu tamién en política anque a un nivel enforma más altu. Ye’l que se vien a llamar “Golpe de falsa bandera” o “Auto-golpe”. Hai bien d’historiadores qu’especulen con que’l golpe del 23-F tien estes carauterístiques porque foi la propia monarquía la que lu alentó y la que lu aparó (pa poder llexitimase). Con too, en feches más recientes podemos ver el que munchos llamen auto-golpe de Turquía, fechu por Erdogán.
Por exemplu, nel casu d’Erdogán, afírmase que’l políticu taba al corriente de qu’había un plan pa facer esti golpe d’estáu; pero calculó que-y vendría bien y nun fixo nada pa torgalu. El casu ye que, depués d’esti golpe d’estáu – de falsa o verdadera bandera – el gobiernu d’Erdogan aprovechó pa reprimir dellos coleutivos que-y yeren desfavorables.
En feches anteriores, la quema del Reichstag, na Alemaña Nazi especúlase que pudo ser un atentáu de falsa bandera. El Gobiernu de Hitler culpó a los comunistes pero emplegó esti ataque como xustificación d’un aumentu de la represión y de la declaración del estáu d’emerxencia, que quitó tovía más llibertaes.
Nes conspiraciones, tamién
Nes teoríes de la conspiración tamién son frecuentes los atentaos de falsa bandera. Ye’l casu, por exemplu, de los atentaos terroristes del 11-S; que pa los defensores de les teoríes de la conspiración son un exemplu d’un atentáu de falsa bandera. Les pruebes d’esto o nun les hai o, si les hai, nun se conocen. En tou casu, sí queda claro que los atentaos del 11-S abrieron la puerta a una serie de cambeos na política internacional y d’intervenciones armaes n’Oriente Medio.
En feches más recientes y en tierres más próximes, hai quien considera que los atentaos de Les Rambles de Barcelona de 2017 podríen ser un atentáu de falsa bandera pela parte del Estáu Español pa manchar al procès catalán. Sicasí, nun hai nengún datu de qu’esto seya verdá.
Dizse tamién que Pearl Harbor pudo ser un exemplu d’atentáu de falsa baldera. Les sospeches – de les que nun hai nenguna prueba – básense nel fechu de que los portaaviones americanos taben toos fuera de la base, polo que taben puestos a salvo (Los portaaviones demostraron ser decisivos na victoria naval nel Pacíficu). Sicasí, ta probao que los xaponeses atacaron Hawaii, si bien la dulda nesti casu per parte de les persones crítiques cola historia oficial básase más bien en si los EEXX sabíenlo y pudieron torgalo o non.
¿Ocúrrensete más exemplos? ¡Nun duldes en compartios con nós y comentar!
