Nun soi de comprar xuegos d’estrena, yo diría que va años que siempre espero un poco a que salga dalguna rebaxa (pémeque l’últimu que compré a preciu de salida foi pa Wii U, conque podéis facer cuentes). Pero un acontecimientu como este merecía ser el meme de Homer elegante, y yá diba díes que nesta casa acutemos la versión Deluxe del xuegu. Sobre esto hai que mentar el desastre de Steam, que pa detrás d’arrampuñar hores a los trés díes d’esclusividá pa los xugadores de PC, hubo dalguna clas d’error téunicu que nos dexó a munchos colgaos un par d’hores, especialmente y d’una manera que nun paez coincidencia, a los qu’aprovechemos ufiertes d’otros marketplaces.
El casu ye que por fin pudimos probar el xuegu. Y ye una maraviya. El tratu de la cinemática de presentación faite pensar que tas viendo una película más, y preséntate una historia que bien podría sirvir pa facer una. Darréu, una especie de tutorial (nada forciáu, conque nun ruempe cola narrativa) que consigue embaecenos dafechu nel mundu de Harry Potter, pa llueu llegar a Hogwarts y escoyer la casa que más nos preste. Los elementos a los que yá tamos avezaos combínense de maneres nueves, demostrando que l’ambientación ye más rica de lo que podíemos pensar, y bien val pa contar munches histories más de les qu’hasta agora conocemos, arriendes d’introducir nuevos elementos nel tresfondu como la cuidada estética máxica del sieglu XIX, o la más importante “maxa antiguo”, que tien pinta de que va aprovechase nes mui probables entregues futures y afitase nel Wizarding World. Per otru llau, y algo a destacar de tol xuegu dende’l primer segundu, ye la guapura de los escenarios, el ciñu que ye bultable que punxeron en facelos y el cuidáu de los detalles.
Sobre la xugabilidá, tamos énte un xuegu de rol en mundu abiertu con tantes posibilidaes como cualesquiera, yá que les lleendes del mapa son muncho mayores de lo que pelo menos yo esperaba y hai bayura d’oxetos d’equipu, craftéu y tresfondu que nun tien nada qu’envidiar a otros RPGs. El combate ye áxil y con posibilidaes divertíes de combos, que t’afalen a esforciate por lluchar guapo, y l’aumentu gradual de manexu de fechizos impide qu’esto aturulle nun principiu.
Por pone-y dalgún “pero”, lo que ye difícil, ún ye qu’ente tantes coses qu’hai que facer en Hogsmead o pel monte, dacuando desdibúxase que tas nun cursu de Hogwarts, porque paez qu’andes tol día de pingu. Tamién ta, y toi esforciándome por saca-y defeutos, que’l xuegu pon unes opciones de rendimientu por defeutu según el to equipu y, pelo menos nel mio casu, nun atinó enforma y tuvi d’andar rabilando nes opciones m’ameyorar los gráficos. Bono, y ta lo del quidditch, que nun hai, y tien tola pinta de que tán esperando unos meses pa sacalu en DLC.
Asina que nada, que si nun lu comprastis yá tais tardando.
