El videoxuegu ambientáu nel mundu de Harry Potter consigue un tercer puestu na llista de los más xugaos de manera simultánea en Steam, con cuasi mediu millón de persones dándo-y al empar inclusive primero de salir oficialmente a la venta; esto ye, con namás que los compradores de la versión Deluxe, a la que tuvieron accesu dos díes y unes hores primero que’l restu los mortales.
Mentanto, na plataforma de streaming Twitch, Hogwarts Legacy llegó a facese cola medaya d’oru en númberu d’espectadores, con más d’un millón doscientos mil usuarios viendo a streamers xugando. Esto supera, asina, el récor qu’hasta agora ostentaba Cyberpunk 2077. Ye algo no que calcar qu’esto se consiuió magar la campaña de boicó escontra’l xuegu, qu’incluye hasta una páxina web con una llista negra na qu’amiesten a los streamers que se muestren xugándolu.
Per otru llau, no respeutive a otres plataformes, en Xapón disparáronse les compres de la PlayStation 5 cola salida del xuegu (yá que pa la versión de Nintendo Switch hai qu’esperar hasta xuet), y el pad DualSense dedicáu al xuegu, de venta esclusiva nos Estaos Uníos y Reinu Uníu, escosó en namás un minutu desque se punxo a la venta, llegando a cayer la páxina de Sony.
Ta claro que’l Wizarding World ta pegando fuerte.
