El Sindicatu d’Actores de Cine termina cola fuelga que trai a Hollywood de cabeza dende va yá una bona temporada (exactamente, dende xunetu), una que fizo dexar pa prau dellos proyectos y retrasó otros milenta. Les conquistes poles que la dan por terminada son, principalmente, un aumentu de los salarios y que pongan llendes a la sustitucion del trabayu de persones por intelixencia artificial.
Asina, paez que les coses vuelven al so calce, pero fáenlo nun momentu complicáu pa les grandes producciones norteamericanes. Y ye que, mientres esta fuelga y la de guionistes asocedíen, pasaron coses como qu’esplotó la burbuya del streaming, y agora suben los precios de les mensualidaes y caen los soscriptores. Esto fizo que les canales pongan frenu a les grandes superproducciones que taben sacando pa les sos canales, y amás qu’anden tol ratu anunciando y desanunciando películes y series pa estes. Nun paez que sepan muncho per ónde dir.
Mientres, nel cine tamién ta la cosa problemática, porque la pita de los güevos d’oru que yera’l xéneru superheroicu paez tar dando les boquiaes. Y ye que yá llevamos más de dos décades desque les punxeron de moda X-Men y Spider-Man, y too tien el so fin (pelo menos, como productu estrella). Toles cifres indiquen que la acabante d’estrenar Marvels va ser un fracasu de recaldación, como yá lo foi la última de la Distinguida Competencia, Blue Beetle. Y agora anuncien, amás, que Captain America: New World Order, la cuarta película del héroe y na qu’Anthony Mackie diba sustituyir a Chris Evans como Centinela de la Llibertá, nun gusta a los directivos y quieren volver a grabar… Talamente como va poco anunciaron que diben facer cola serie viniente de Disney+, Daredevil: Born Again. Ente estos problemes y la fuelga, pa 2024 namás vamos tener una película de Marvel, Deadpool 3, y toles demás pasen pa 2025.
D’otra manera, mientres el futuru de los superhéroes pinta mal, hai otres franquicies que puen tar prediciendo qué ye lo que se va llevar nos próximos años. Y ye que les películes más esitoses d’esti añu son Barbie y Super Mario Bros., basaes una nuna moñeca y otru nuna saga de videoxuegos qu’empezó nos ochenta. Por supuestu, tanto Mattel como Nintendo tán yá trabayando en llevar otru cientu de franquicies al cine, como l’otru día vos anunciábemos cola adaptación de Zelda.
Ta claro que vienen cambios, pero personalmente dame mieu que seyan a peor. Y ye que, anque nos cómics hai hestories de superhéroes pa tolos gustos y edaes, lo que s’adapta a los cines ye en xeneral bastante simplayo. Alan Moore tenía razón, pa mio idea, en que teníemos un problema cola infantilización de la sociedá, con adultos diendo en masa a ver hestories creaes pa preadolescentes. Y qu’agora pasemos a películes de moñeques pa ñeñes pequeñes y videoxuegos antiguos nun ye una superación del problema sinón tolo contrario, que siguimos cayendo pel abismu.
