La editorial avilesina HT Publishers acaba de convocar el primer concursu femenín de creación de xuegos de rol. Esti premiu tien como oxetivu premiar a la creadora muyer que presente’l meyor proyeutu de xuegu de rol p’asoleyase. Amás d’asoleyalu, la editorial ufierta a l’autora un pagu de 300€ en conceutu d’avance polos drechos de les ventes. En Refuelgu gustónos muncho esta guapa midida que fai por facer un poco más igualitariu’l mundu de los xuegos de rol onde si bien ye verdá que cada vez hai más muyeres xugando, nun ye menos cierto qu’hai bien poques que s’atrevan a dar el pasu y crear un xuegu de rol. Contéstanos Tiberio, que ye la cabeza al frente d’esta editorial y d’esta iniciativa.
HT Publishers ye una empresa asturiana (Avilés) que se dedica a facer xuegos de rol: ¿Ye posible vivir d’esta industria cultural anguaño?
Ye difícil, mui difícil. Yelo yá, vivir d’editar llibros, si amás te concentres nuna estaya como la nuestra, yelo más tovía. Ye una profesión que s’escueye por amor, y ye importante preparase sicolóxicamente pa sufrir muncho.
¿Cuántos sois y cuánto lleváis nesto? ¿Cómo ye la vida d’un editor de rol?
Ésti ye’l nuestru sestu añu, na editorial somos cinco socios, si bien la xente que facemos les xeres principales somos trés persones (dos socios y una empleada). La profesión d’editor ye per una parte mui solitaria (la mayor parte del to trabayu fáeslu delantre d’un ordenador) y per otra parte tas tol tiempu falando con xente o remanando les redes sociales. Tien muncho de sicólogu porque una de les partes más importantes del to llabor ye entendete con una montonera xente y consiguir que collaboren bien ente ellos.
¿Cómo veis l’afición polos xuegos de rol n’España? ¿Hai más que va unos años, menos o igual? ¿Y n’Asturies?
Vivimos una época dorada, yo creo que nunca hebo tanta xente xugando y creando rol. Ye un bon momentu pa ser roleru tantu a nivel d’España como de la nuesa Asturies.
¿Cuálos son los xuegos de los que más copies vendistis? (Y cuántes si nun ye indiscreción) ¿Qué ingredientes pienses que tien que tener un bon xuegu de rol?
Savage Worlds ye’l nuesu productu estrella. D’él vendimos más de mil exemplares, de cauna de les dos ediciones que sacamos. Otru ye El Hombre Abstracto, un xuegu de terror nel sXVII nel que apaez descrita como posible llugar de xuegu les “dos Asturies” de daquella, “la d’Uviéu” y “la de Santillana”.
Yo creyo qu’un bon xuegu de rol ha ser sobre too y primero de too divertíu de xugar. Ye daqué que se consigue sobre manera gracies al sistema, y esto ye daqué que la xente del mundín suel ver como secundario, na mio opinión, de forma errónea.
¿Cuál
ye’l que más vos gusta de los vuestros? ¿Y de los que nun son
vuestros?
Pos voi confesate dalgo de lo que nun toi mui arguyosu, pero’l casu ye que dende va munchu tiempu namás dirixo Savage Worlds, dame muncha galbana dirixir otros xuegos ¡SW tien tolo que me presta!
Pero sí que xuego, como xugador, otros xuegos. Gústenme xuegos mui estremaos, como Aquelarre, Ratas en las paredes, Monsterhearts 2 o Blades in the dark.
Una de les coses más interesantes de HT Publishers, ye qu’entamastis el I Concrusu de diseñadores (muyeres) de xuegos de rol. ¿Ye’l primeru d’estes carauterístiques n’España? ¿Y nel mundu?
El primeru n’España sí. Del mundu, si te soi sinceru, la verdá ye que nun lo sé. Nun me paez que lo seya.
Ente la comunidá rolera… ¿Qué porcentaxe de muyeres pensáis qu’hai?
Ye la entruga del millón. Toos tenemos claro que’l porcentaxe medró muncho, pero hasta qué puntu ye un misteriu. Paezme que la cifra muévese nun intervalu d’ente’l 30 % y el 45 %. Pero nun tengo datos fiables.
¿Por qué pensáis que tovía hai esi estigma un tantu machista pente los roleros? (Pensemos nes portaes de dellos xuegos de rol que meten mieu nesti aspeutu)
Ameyoramos nesi tema, ye verdá que queda tovía munchu camín por percorrer. Crey oque ye una inercia heredada d’una dómina na que los autores buscaben gustar a un públicu específicu que pensaben que yera namás masculín. Y como tantos cambios necesarios, hai daqué de resistencia en dellos sectores que nun quieren que cambien les coses.
¿Qué xuegos de rol creaos por muyeres recomendaríeis?
Hai más de los que la xente piensa. Monsterhearts 2 ye un xuegu maraviyosu nel que los xugadores son adolescentes que tienen que tapecer que, amás, son monstruos (homes llobu, vampiros, etc). El Marvel Heroic Roleplaying ye’l meyor xuegu de superhéroes que conocí nunca. La Novia de Barbazul ye un maraviyosu xuegu narrativu de terror fantásticu…
Pa una muyer que xuega al rol pero que nunca nun s’animó a facer un xuegu de rol, escribilu y mandávoslu al concursu… ¿Qué conseyos-y daríeis? ¿Qué tendría que facer?
De mano y primero de too, que pierda’l mieu al fracasu. Hasta nel peor de los casos, daqué va deprender de la esperiencia y anque nós refugáremos-y el testu, siempre diba poder unvialu a otres editoriales, autoespublizalu o dexalu llibre n’internet.
Pa la xente qu’escriba’l so primer xuegu, recomendaría-y facer daqué cenciello, que nun se complique muncho. Les dimensiones mínimes que pidimos son unes 50 páxines, ehí pue metese un xuegu completu ensin problemes, si nun ye un xuegu demasiao complicáu.
Nes bases del concursu dicís “La lengua principal del juego ha de ser el castellano, independientemente de que pueda incorporar fragmentos en otras lenguas o que luego pueda publicarse traducido a otros idiomas” ¿Podríemos ver un xuegu en dos ediciones asturianu/castellano si gana una asturiana?
Molaría munchísimo. La diversidá llingüística ye una de les xeres que mos gustaría fomentar, miramos un poco nel pasáu, sacando por exemplu fueyes de personaxe n’estremaos idiomes, con poco éxitu. Pero sí que ye una de les coses que mos gustaría trabayar nel futuru.
¿Cuántes participantes esperáis qu’heba?
Yo creyo que si recibimos unos 20-30 xuegos, la convocatoria diba ser un éxitu.
Si hai munches obres que tengan calidá abondo… ¿Plantegáisvos sacar más además de la premiada?
Sí, de fechu la esperanza ye que seya asina.
Una de les coses que dicís nes bases ye l’apuesta polo “fresco” y por una “Mayor diversidá rolera”: ¿Pensáis qu’hai poca diversidá nes temátiques o nos enfoques actuales? ¿Qué echáis de menos?
La gran mayoría de los xuegos de rol escritos n’España escribímoslos homes blancos, cis de más de 30 años ¡Y son bonos xuegos! Nun buscamos qu’esti perfil apare d’escribir xuegos. Pero paezme que toos tamos d’alcuerdu en que si incorporamos una diversidá mayor de creativos va haber nueves idees y trabayaremos más n’aspeutos que qu’igual hasta agora nun tuvieron tanta importancia. ¿Cualos esautamente? Creyo que yo nun soi el que tien que reflexonar sobre eso.
