L’Academia de la Llingua Asturiana acaba de nomar a Inaciu Galán (Xixón 1986) como académicu de númberu de la institución. Ye un casu verdaderamente únicu, pos, polo xeneral, los académicos de númberu solíen designase ente los correspondientes, una categoría inferior y honorífica d’académicos que tienen drechu a voz pero non a votu. Inaciu Galán va convertise en miembru el próximu 6 de Mayu. Inaciu Galán ye’l primer académicu “millennial” con tolo qu’eso significa: Nació depués de que l’ALLA o la Comunidá Autónoma d’Asturies esistieren y el so CV toca palos tan estremaos como la lliteratura, la investigación (ye doctor), el turismu, el periodismu, la radio, la televisión o la docencia.
¿Una aspiración de toa una vida? ¿Cómo te sentisti al conocer la noticia?
Un gran honor qu’entá nun soi a creyer. Llevo munchos años de rellación cola ALLA. Con diecisiete años fixi la prueba de conocencia, darréu fui alumnu de los sos cursos, gané dellos premios d’investigación de la entidá, participé nes Xornaes Internacionales d’Estudiu, nes sos publicaciones d’investigación y lliteraries, nel TermAst, fui profesor y conferenciante na Universidá Asturiana de Branu… Ye una rellación constante, pero que te faigan académicu de númberu ye un honor talu qu’entá lo toi asimilando. Dempués ta la parte del pesu de la responsabilidá que sientes. El Día de les Lletres Asturianes va ser bien guapo recibir la insinia d’académicu y tal reconocencia, pero dempués vien un compromisu pa tola vida cola insitución y sobre too col idioma, con tentar de ser lo más útil y eficiente posible, yá non como un activista o escritor, sinón como unu de los responsables directos de la normativización de la to llingua. Espero tar al altor del gran llabor que fixeron y faen los académicos y académiques nestos cuarenta años caberos.
Yes el primer académicu que naz depués de la fundación de l’ALLA. ¿Ye mui distinto ser académicu cuando se ye millennial?
Como entá nun lo soi hasta’l nomamientu nel Día de les Lletres Asturianes, nun te sé dicir (rises). Pamidea la mio perspectiva sedrá un daqué distinta en delles cuestiones a la del restu d’académicos y académiques, básicamente pola diferencia d’edá y de vivencies. Pero eso nun significa que seya meyor. Paezme que va ser mui bono poder trabayar xuntos y xuntes na Academia persones d’edaes tan estremaes, dende los ñacíos nos años trenta hasta min, que ñací a finales de los ochenta. Yo tengo muncho que deprender d’ellos y de la so esperiencia, va ser un lluxu poder trabayar al so llau, y yo espero aportar dalgo de lo deprendío nos yá más de venti años que llevo trabayando la cuestión dende distintos ámbitos, pa que l’Academia siga afayándose a los tiempos y medrando na so actividá nun mundu y unes circunstancies mui estremaes a les que s’enfrentó la institución nel sieglu pasáu.
Yes un casu llamaderu d’académicu que ye direutamente de númberu ensin pasar per ser un académicu correspondiente y nun ye lo común ¿Hebo más casos asina? Llama l’atención y fainos pensar que’l nun te nomar primero tenía más que ver colos años que colos méritos, que lleven siendo munchos bien de tiempu. ¿Hai que tener “una cierta edá” pa ser miembru de l’ALLA?
Si nun m’enquivoco, si qu’hebo más casos nos que se nomó directamente como miembru de númberu, recurdo’l casu de Berta Piñán nel 2008, por exemplu. Tamién la hestoria de l’ALLA tien exemplos d’académicos nomaos con munchos menos años que yo, como Xuan Bello, Carlos Rubiera, Ramón d’Andrés o la propia Ana Cano, como miembru fundacional, anque ye verdá que más bien nos entamos de la institución, cuando l’asturianismu tenía una media d’edá mui moza. Sobre ello alcuérdome de l’anécdota que me cuntó Xuan Bello, asocedida nuna de les primeres xuntes d’escritores asturianos, nos ochenta, cuando un escritor catalán que vieno a Asturies convidáu a aquella xuntanza entrugó ónde taben “los vieyos”, porque namás había escritores mozos. Anguaño la situación ye bien distinta, sigue habiendo muncha mocedá, hai relevu continuáu, pero agora sí tenemos a los nuesos grandes, un bon fondu de xente comprometío y con una llarga esperiencia y un trabayu ablucante al llombu. Por eso tengo pa min que lo importante güei ye aprovechar los puntos fuertes que tien ser mozu y ser vieyu, formando equipos que se complementen.
¿Tienes yá preparáu’l discursu?
Tengo delles idees de lo que quiero tresmitir y toi trabayando pa poneles sobre’l papel. Ye un discursu importante pa min y lo que tengo claro ye que quiero tresmitir agradecimientu, pero tamién compromisu de trabayu. Prestaríame trabayar na Academia en tolos ámbitos nos que pueda y siguir collaborando a facer de la institución un espaciu tresversal nel que se sientan representaos tolos ámbitos que trabayen la cuestión llingüística n’Asturies, pero sobre manera, que siga ganado complicidaes ente la sociedá, abriéndose y dando a conocer el so llabor en tolos ámbitos. Les llingües d’Asturies precisen siguir sumando voluntaes y manes que trabayen por elles dende tolos sectores. El discursu percorrerá esos y otros caminos.
“Prestaríame trabayar na Academia en tolos ámbitos nos que pueda y siguir collaborando a facer de la institución un espaciu tresversal nel que se sientan representaos tolos ámbitos que trabayen la cuestión llingüística”
¿Cómo ves el rol de l’ALLA agora que tolos documentos normativos (gramática, normes y diccionariu) lleven décades asoleyaos? ¿Cuál ha ser el rol de l’ALLA anguaño?
El llabor d’una academia ye inmensu y nun termina nunca, porque les llingües evolucionen y les necesidaes de los usuarios camuden y fai falta dir actualizando les ferramientes. Na mio visión doble de periodista y profesor, fui atopando la necesidá d’erbíes normatives pendientes, como la cuestión ortolóxica, les terminoloxíes nueves que ye preciso dir incorporando en xurdiendo, les cuestiones alredor del llinguaxe inclusivu, etc. Amás, l’Academia, nun se pue escaecer, tien ente les sos funciones ser garante de los drechos llingüísticos de los asturianos y asturianes, y esi ye un llabor que tamién sigue faciendo falta. Por nun falar del llabor formativu, cola Universidá Asturiana de Branu, los cursos en collaboración con otres entidaes, el llabor investigador, etc.
Como diximos, el to nomamientu nun ye namás un reconocimientu honoríficu, sinón un formar parte con tolos derechos y deberes de l’ALLA. ¿A qué vas dedicar la to xera?
Pel momentu lo primero ye deprender de lo muncho que saben d’esti llabor los académicos y académiques que lleven tantos años trabayando na ALLA. Darréu d’ello espero incoporame a les comisiones de trabayu onde camienten que pueda ser útil y aportar propuestes que podamos incoporar al llabor de la institución. Quien me conoz sabe qu’esfruto trabayando pol asturianu y que nun sé tar quietu, asina que taré a disposición pa incoporar lo que seya d’utilidá pa los oxetivos de l’ALLA y del equipu directivu encabezáu por Xosé Antón González Riaño, que vien faciendo un llabor mui positivu.
Delles academies como la francesa, reflexonen munches veces sobre la necesidá d’una reforma ortográfica. ¿Pienses que l’asturianu rique d’ello?
La cuestión ortográfica ye conflictiva, en mayor o menor midida, en toles llingües, y mui especialmente nes minorizaes. Nel casu del asturianu construyóse una ortografía basada na tradición y nuna visión pragmática del so momentu, los años ochenta, onde había munchos falantes patrimoniales ensin alfabetizar. Dempués tuvo delles igües que matizaron cuestiones que xeneraben más desalcuerdu en dalgunos sectores y güei tien una aceptación mui alta ente los usuarios y usuaries del idioma, incorporada dafechu nel usu institucional, l’enseñu o los medios de comunicación. Dende los ochenta a güei camudaron munches coses na sociedá asturiana, y nel restu de la comunidá llingüística asturllionesa, y paezme mui interesante que se fale d’ello y s’alderique sobre les posibilidaes. Nun m’asusten los cambios, pero siempres que se sepa buscar el momentu afayadizu, se faigan con intelixencia y se consiga un consensu ente los usuarios a lo menos tan ampliu como’l qu’esiste agora. Esti consensu ye daqué qu’otres llingües minorizaes de la nuesa contorna nun tienen y xenera munches complicaciones. Nun me prestaría esa situación pal asturianu, asina que camiento que la prudencia ha guiar cualesquier pasu nesti ámbitu.
“Nun m’asusten los cambios [del modelu otrográficu], pero siempres que se sepa buscar el momentu afayadizu, se faigan con intelixencia y se consiga un consensu ente los usuarios a lo menos tan ampliu como’l qu’esiste agora”
L’ALLA ye una institución asturiana pero tien una cierta capacidá d’aición fuera de la comunidá autónoma. ¿Qué pue facer l’ALLA pol llionés?
Paezme que se fixeron coses interesantes y que pue siguir ampliándose esi llabor. Dende los sos entamos l’Academia cuntó con miembros de Llión, Roberto Gozález-Quevedo, de mano, y Nicolás Bartolomé dende va unos años, lo qu’amuesa una visión global del idioma. Ye importante siguir nesa collaboración y que los usurios del idioma en Llión tengan como referencia a l’ALLA, que seya una academia que reconozan como propia tamién. Y lo mesmo col restu los territorios, colos que l’Academia vien teniendo contactos y collaboración, como col casu del mirandés, variedá asturllionesa representada na ALLA pol miembru d’honor Júlio Meirinhos. Sobre’l mirandés asoleyóse una encuesta sociollingüística y dellos trabayos, l’últimu El Mirandés: historia, contexto y procesos de formación de palabras, d’Alberto Gómez. Yo dende les entidaes nes que trabayé, y tamién de forma personal, caltuvi y caltengo rellación con escritores, activistes y llingüistes de tolos territorios del tueru asturllionés, impulsando campañes y eventos que trabayen la conciencia de xunidá llingüística. Dende l’Academia espero ser tamién un elementu d’encontu ya impulsu a esti trabayu pensando en tol dominiu llingüísticu asturllionés.
“Ye importante siguir nesa collaboración y que los usurios del idioma en Llión tengan como referencia a l’ALLA, que seya una academia que reconozan como propia tamién”
¿Por qué pienses que puede dar la impresión dende fuera de que cuesta introducir neoloxismos nel DALLA, a pesar de la xera tremenda que son los TermAst?
El DALLA foi un trabayu inmensu de venti años que supunxo un pasu clave pal asturianu y pol que se tuvo esperando cuasi doscientos años, dende la propuesta de Xovellanos de redactar un diccionariu del asturianu. Foi xunto a les Normes y la Gramática, el gran llogru pal idioma de la presidencia de Xosé Lluis García Arias. Pasaos yá otros venti años, cola dixitalización del DALLA pel mediu, quiciabes podría ser momentu de da-y una vuelta a delles cuestiones pa facelu una ferramienta normartiva más dinámica, que permita añadir o camudar léxicu con mayor facilidá. Ha tenese en cuenta que l’ALLA tuvo siempres un presupuestu mui curtiu y eso condicionó abondo la so capacidá pa remanar reformes nun proyectu tan grande como’l DALLA. Les tecnoloxíes actuales van permitir facilitar esi llabor, y cónstame qu’hai planes pa ello. Espero incoporar dalguna idea que pueda ser útil.
¿Cómo ves la situación de la llingua asturiana y qué rol te paez que pue xugar l’ALLA?
La situación del idioma ye complicada. Precisamos ganar falantes y nun tenemos les ferramientes pa ello. La falta d’oficialidá torga cuntar coles ferramientes educatives y d’otru tipu que se faen precises pa una normalización efectiva del idioma. Per otru llau, no que cinca al consensu políticu y social, nunca foi mayor y más intensu a favor de la oficialidá del asturianu y l’eonaviegu. L’ALLA tien un papel institucional y vien faciendo un bon llabor como entidá qu’ufre los datos sociollingüísticos, que da conseyu sobre les cuestiones técniques xurídiques, que trabaya na construcción del consensu. Esa capacidá d’interllocución que tien anguaño l’ALLA paezme’l llogru más granible del presidente Riaño, anque yá arrancó col papel firme pero absolutamente amable de la presidenta Ana Cano. L’ALLA ye una institución al serviciu de tolos asturianos y asturianes, y sollertes a la salvaguarda de los sos drechos llingüísticos, tien un papel fundamental como espaciu nesi llabor que podemos llamar d’información y reflexón continuada. Tampoco hai qu’escaecer que l’Academia tien l’encargu estatutariu de velar pol eonaviegu y failo al traviés de la Secretaría Llingüística del Eo-Navia. Paezme importante siguir enanchando esi llabor, como ta faciendo agora la institución cola preparación d’un diccionariu eonaviegu.
“no que cinca al consensu políticu y social, nunca foi mayor y más intensu a favor de la oficialidá del asturianu y l’eonaviegu”
¿Qué opines de la política llingüística que ta faciendo la conseyería de Berta Piñán? ¿Qué se podría ameyorar?
Al mio paecer nun tenemos una política llingüística afayadiza. El gobiernu actual, sobre manera’l presidente Barbón, tienen un actitú mui diferente a la de los presidentes caberos, eso ye evidente. Usa l’asturianu, fala en positivo, defende la oficialidá (anque con menos puxu del que me prestaría), pero falta un mayor impulsu dende’l departamentu responsable de la política llingüística, asina como dende otres conseyeríes. Pa facer política llingüística precisamos una planificación que xurde de los planes de normalización. Anguaño nun tenemos esta ferramienta. Ensin ella nun podemos saber qué oxetivos hai, nin valorar la so consecución o incumplimientu. Lo que puedo dicir ye una percepción de lo que veo y de lo que cuenten. Observo un gran interés por tomar midíes alredor de la promoción de la lliteratura n’asturianu, que me paecen estupendes, pero que soles nun son quien a camudar la situación de minorización del asturianu lo más mínimo. N’estayes clave como l’enseñu o los medios de comunicación públicos, non solo nun se dieron pasos alantre, sinón que retrocedimos en comparanza col gobiernu de Javier Fernández. N’otres, como la visibilidá en campañes institucionales, sí qu’observamos que se ta usando l’asturianu en delles ocasiones. Hai muncho por facer, y espero qu’esti añu de llexislatura que queda podamos ver dalguna midida que me faiga ser más optimista. Esta falta de planificación y d’acción, con cuntaes escepciones, podemos treslladalo a los conceyos onde gobiernen partíos que lleven la oficialidá nel programa. Habría notase más que sofiten la oficialidá, con daqué mui cenciello, usar l’asturianu en tolos ámbitos. ¿Y qué dicir d’aquellos conceyos gobernaos pol PP, que nun ta pola oficialidá nesti momentu pero diz sofitar la Llei d’Usu? Nun tán aplicando la llei.
“Observo un gran interés por tomar midíes alredor de la promoción de la lliteratura n’asturianu, que me paecen estupendes, pero que soles nun son quien a camudar la situación de minorización del asturianu lo más mínimo”
¿Crees qu’hai voluntá real d’algamar la oficialidá nos partíos?
Toi convencíu de que sí. La realidá ye que pensábemos cuasi toos que cuntábemos con 27 votos y hai unu votu que sigue ensin sumase, anque diz que ta a favor de la oficialidá, el d’Adrián Pumares. ¿Paezme que los demás partíos (FSA-PSOE, Podemos ya IX) cometieron errores o pudieron implicase más na busca d’un alcuerdu? Por supuestu, pero cuéstame echa-yos la culpa cuando la realidá ye que taben, y tán, dispuestos a firmar una reforma ensin condiciones, sacantes la oficialidá, arrenunciando a munches cuestiones mui importantes pa los sos idearios y programes. Ye bien triste tamién ver que’l PP sofita la oficialidá en Galicia y al cruciar la ría del Eo esa postura camuda, o que Ciudadanos tea pol billingüismu n’otros territorios y equí arreniegue d’ello. De VOX nun podemos esperar nada, evidentemente, salvo que sigan trabayando dende l’odiu contra l’asturianu y. dende la falta de respetu pa les persones que defendemos la diversidá llingüística o de cualesquier otru tipu.
¿Pienses que va ser posible primero de qu’acabe esta llexislatura o va haber que votar otra vez?
Anque dicen que soi mui optimista, y nun piesllo la puerta nin dexé de trabayar nesa posibilidá dende la mio modesta posición como activista, a día de güei véolo daveres difícil. La pelota ta nel teyáu d’Adrián Pumares y nel papel que quiera xugar na hestoria. Esta llexislatura danse toles circunstancies pa que pueda salir bien, y ye llamentable que nos faigan perder esta oportunidá esperemos que non única. Pero la siguiente llexislatura ta ehí, a la vuelta la esquina. Hai que trabayar pa siguir ampliando’l consensu a otros partíos políticos y contribuyir a que la sociedá sofite con más intensidá la oficialidá, d’ello depende tener una oportunidá de futuru pal asturianu.
