Al fomentu de la producción, distribución y exhibición de la cinematografía y los audiovisuales en llingües oficiales distintes al castellanu, la llei acabante d’aprobar amiesta la de llingües reconocíes estatutariamente poles comunidaes autónomes, lo qu’incluye nesti l’asturianu, arriendes de les llingües de signos españoles. Ello va implicar l’accesu a ayudes a los audiovisuales n’asturianu, en toles fases de creación y promoción, a les qu’hasta agora nun yera posible.
Otros aspeutos de la llei son la obligatoriedá de les plataformes de streaming d’asoleyar l’audiencia de los sos programes en favor de la tresparencia, cuotes al cine européu, latinoamericanu y dirixíu por muyeres, asina como dar mayores facilidaes a les sales de cine rurales y independientes.
Esta llei ta incluyida nel Plan de Recuperación, Tresformación y Resiliencia del que l’oxetivu ye fortalecer el texíu empresarial, ameyorar el clima d’inversión y afitar España como plataforma de inversión audiovisual y país esportador de productos audiovisuales.
Si vos presta tener más información al respeutive, podéis entrar na páxina del Ministeriu de Cultura y Deporte calcando equí.
