Patxi Amezcua (25 kilates, Séptimo) escribe y dirixe un thriller sobrenatural rodáu, ente otres poblaciones, en L’Infiestu, Xixón y Mieres, arriendes d’en Galicia. L’argumentu: en marzu de 2020, acabante d’empezar l’estáu d’alarma, apuerta de sópitu una moza desapaecida y a la que se-y diera por muerta; del monte, en camisón y garrando un moñecu raru. Y, según investiguen el casu, los axentes de policía encargaos van empezar a pensar qu’esiste una fuercia sobrenatural detrás de lo asocedío.
La película, de la productora Vaca Films y protagonizada por Isak Férriz (Gigantes) y Iria del Río (El increíble finde menguante), estrénenla en Netflix el próximu vienres trece de febreru, siendo la primer película española que sal anguaño na plataforma.
Ye una pena que’l títulu nun use la toponimia oficial, y, anque esperamos con toles veres de l’alma equivocanos, ye bastante probable que, como yá tamos avezaos por otres producciones, como la de la mesma canal Alma, podamos “esfrutar” de ver paisanos de pueblos asturianos usando’l pretéritu perfeutu compuestu.
