Paul Urkijo (Errementari) dirix la producción (acabante de preestrenar en Donostia) Irati, una película d’ambientación medieval, producida n’euskera, na que s’axunten historia, fantasía y horror no que promete ser una gran aventura d’espada y bruxería. Con un presupuestu de más de cuatro millones d’euros, toles crítiques tán siendo de momentu estupendes, y calquen na calidá de los efeutos visuales. Yá recibió cinco nominaciones a los premios Goya, y en Sitges diéron-y el del públicu y el de meyores efeutos especiales.
L’argumentu: nel sieglu VIII un vascón cristianu ha recuperar el cuerpu robáu de so padre, un caudiellu que s’enfrentó a Carlomagnu, y l’ayalga enterrada con él. Pa ello precisa l’ayuda d’una moza pagana, la que da nome a la película. Y asina, los dos adiéntrense nes fondures d’un monte estrañu, onde “tolo que tien nome esiste”.
La película estrénase esti vienres y, por si naguáis por saber qué pinta tien, dexámosvos col avance n’euskera (sotituláu al castellanu) calcando equí. Eso sí, nos cines fuera de zones euskofalantes ye mui probable que la atopéis doblada.
