Entamóse una bien gorda en Twitter, apocayá, en criticando Arturo Pérez-Reverte la última película de James Bond, No Time to Die. L’escritor acusó al protagonista de “moñas”, y fizo goña d’un fotograma nel qu’una muyer lu lleva en moto y el gárrase a ella “como para no molestar”. Quien equí vos escribe nun tien l’envís de defender a Pérez-Reverte, que tampoco nun ye que me caya mui bien, pero sí siento la necesidá d’aclariar delles coses.
Yo nun soi mui fan de James Bond, anque por unes circunstancies o por otres sí teo visto como diez de les películes (de Sean Connery, Pierce Brosnan y Daniel Craig) y lleío trés noveles (de les que creyo recordar qu’una nun la acabé). He dicir qu’al enfrentame a los llibros, con eses trés versiones de les películes como referentes, escandalexéme enforma. Nun sé si a Ian Fleming-y paecía simpáticu’l personaxe que creó, o si pelo menos pensaba que yera un puntu col que tomaría unos cacharrinos, pero espero con toles veres del alma que nun fora asina. Nes noveles alcontré un personaxe desagradable, cruel y rensiosu, y con unos pensamientos pa coles muyeres que la verdá que metíen mieu. Permitíime sacar la culiebra’l matu y presentar un cachín de la primera de les noveles, Casino Royale:
Miróse n’espeyu y entrugóse pola moral de Vesper. Quería’l so cuerpu fríu y soberbiosu. Quería ve-y llárimes y deséu nos desaboríos güeyos azules, garra-y coles manes los rizos de pelo moreno y doblar el so cuerpu esguiláu so él. Bond medio zarró los güeyos y l’espeyu devolvió-y una mirada famienta.
Que so sepa, nunca nun adautaron el personaxe al cine d’una manera fiel. El de Sean Connery yera un paisanu mociegu, descaráu y bebedor, dexando de la moral turbia del personaxe lo que d’aquella resultaba gracioso pa un héroe piraván. Dicen que’l de Roger Moore yera dalgo más fiel. Pero ye bultable qu’hai qu’escoyer qué Bond queremos más. Y pienso que querer un James Bond babosu nun significa selo tu tamién, nin tampoco ser un retrógadu. De fechu, la versión de James Bond más fiel al de les noveles que yo conozo nun ye mesmo la d’unos rancios, sinon la d’Alan Moore y Kevin O’Neill en The League of Extraordinary Gentlemen (cómics de los que tenéis una reseña equí) onde llamándolu “Jimmy”, pa nun se meter en problemes llegales, preséntenlu como un asquerosu, un forciador y un traidor a la patria. A estes, cabe señalar que nesta obra muestren les distintes encarnaciones de Bond en cine como una serie d’axentes que tomaron el nome del orixinal, siendo’l de Connery “l’axente J1” y el de Craig “l’axente J7”. Y a esti caberu, pola mor del esvaciáu de personalidá que tien sufrío el personaxe a lo llargo los años, preséntenlu como un asesín fríu y despiadáu que nun tien sentimientu dalu.
Y ye que, pa nun tener un robó col que ye imposible, non yá coneutar, sinon que produza dalguna emoción, seya bona o mala, fai falta un calter claru. Ye normal, pienso yo, que los que lleven la franquicia de superproducciones quieran facelu un personaxe más simpáticu y adautáu a los tiempos, lo que va xuncío, inevitablemente, a deconstruyir la so masculinidá. Pero tamién ta bien xustificao querer que seya un fíu de mala ma, porque asina yera’l personaxe orixinal. Hai un enclín a querer que los héroes seyan santos y los villanos diabólicos, asina too resulta más cenciello. Pero, pa mio idea, y sacantes delles esceiciones que se puen contar colos deos, ello fai los personaxes abondo menos interesantes.
