El 26 y 27 de marzu fízose n’A Coruña, nel recintu ferial d’Expocoruña, la segunda edición de la Japan Weekend Galicia. Durante’l fin del selmana hebo una montonera d’actividaes venceyaes a lo friqui y al ociu alternativu: dende cosplay hasta k-pop, karaoke y hasta conciertos.
Ún de los invitaos foi l’idol Ladybeard, habitual nes Japan Weekend enantes de la pandemia, tou un fenómenu en Xapón, que presentó al so nuevu grupu, Babybeard, y dio un conciertu’l sábadu pela tarde y otru’l domingu. Amás de cantar delles canciones d’él, tamién interpretó canciones d’otros grupos perconocíos en Xapón, como PAPAYA de la banda de metal Babymetal. Nos sos conciertos, amás de cantar y bailar, ye habitual que tamién tenga una pelea de llucha llibre (porque Ladybeard ye tamién lluchador profesional d’esta disciplina).
D’otra estaya bien importante, acudió como invitada l’actriz de doblaxe Monstserrat Davila, que tien desendolcada parte de la so carrera como dobladora en gallegu, con papeles perconocíos como Bunny Tsukino (Sailor Moon), Nami (One Piece), Nene (Shin-chan) o Clara (Heidi). Pero nun tuvo sola, taba tamién l’actor de doblaxe Gonzalo Faílde, que tien tamién una montonera de trabayos, ún de los últimos el de la voz en castellán de Javier Bardem en Dune. Amás, hebo una charra del doblaxe d’anime en gallegu.
Nel ámbitu del cosplay asistieron como invitaes les cosplayers Andivi cosplay, Bel cosplay y Sumiree, qu’amás de ser xuráu nel concursu de cosplay, tuvieron puestu con prints y tamién dieron delles charres nos dos díes del eventu: “Accesorios pa facer la vida más fácil” y “Pasos pa que’l cosplay salga meyor (y que nun facemos)” de Bel cosplay, y “Materiales pa iniciase nel cosplay” d’Andivi cosplay.
No tocante al concursu de cosplay que se fizo’l sábadu, hebo bastante participación. Magar que’l concursu tenía la opción de facer actuación, nun hebo bastantes participantes y solo se dieron los premios de pasarela. Ganaron les cosplayers Mina (de Saber Bride), Meru Cosplay (col cosplay de Historia Reiss de Shingeki no Kyojin) y Eru (col cosplay de Link de The Legend of Zelda: Breath of the wild). Tamién hebo concursu de Asian Dance el sábadu pela mañana y de Karaoke el domingu pela tarde.
Amás, hebo tamién dos talleres a cargu de l’asociación cultural asturiana Hijos del Lobo, ún de facer veles y otru de facer cotes de malla. Amás, hebo dellos torneos de videoxuegos y tamién concursos de dibuxu y ginkanes de cultura xeneral.
La Japan Weekend Galicia apostó polos puestos d’artesanía y tenía un Artist Alley con más de 70 puestos nel que se podíen atopar llaveros, ayalgues, ilustraciones y toa mena de creaciones d’artistes nun solo de Galicia, sinón tamién d’otres partes d’España. Ente’l merchandising que se podía mercar había arte d’animes, películes, llibros y sobretoo videoxuegos (sobretoo del League of Legends y Genshin Impact).
Japan Weekend ye una xira de feries que percuerren delles ciudaes españoles, como Madrid, Barcelona, Granada, Burgos o A Coruña. Lleven ya más de diez años percorriendo España y magar l’aciu del coronavirus, cada vez espoxiguen más en tamañu y conteníu y tán entamando a recuperar les visites d’invitaos internacionales. Tien previsto volver a Galicia nel mes d’ochobre na que va ser la so tercer edición ellí.
