Metrópoli danos una noticia estupenda, y ye que’l míticu dibuxante norteamericanu, John Romita Junior, va venir a la Metrópoli Comic Con, que se celebra en Xixón ente’l trenta de xunu y el nueve de xunetu. Por si acaso nun lo sabéis, John Romita Jr. ye ún de los autores de cómic vivos más importantes del mundu, dibuxante de más d’un centenar d’historietes de Spider-Man, una de les etapes meyor valoraes de Thor, la famosa Kick-Ass o, de la mano de Frank Miller, la historia que recuenta l’orixe del defensor ciegu de la Cocina del Infiernu, Daredevil: The Man Without Fear. Y esto solo por mentar namás dalgún de los trabayos del autor. Ganador, amás, d’un Premiu Eisner honoríficu, tuvo yá nel Metrópoli en 2017, pero namás per conexón online, y ye qu’esta va ser la primer vegada que va venir físicamente a España.
Y masque los anuncios de los famosos convidaos a la X Edición de Metrópoli Comic Con acaben d’inaugurase y pinta que guarden unes cuantes sorpreses, tamién sabemos yá que va venir l’actor Anthony Daniels. Y anque pueque nun vos suene’l nome, quiciabes nin siquiera la cara, ye porque nel papel pol que lu conocemos nun la enseña: ye’l de’ún de los robós más conocíos del mundu, el droide de protocolu C-3PO de la saga de Star Wars. Y tamién ta confirmada la presencia de David Galindo, Salva Espín y Antonio Resines pa presentar un cómic nel qu’esti últimu ye l’héroe protagonista, Sargento Resines.
No tocante a otres coses de la Metrópoli, específicamente a la parte musical, ta confirmaes les actuaciones de Lola Índigo, Mago de Oz, Camela, Sidecars, Fusa Nocta, Huecco, Daviles de Novelda, Nanpa Básico, Tigre y Diamante y Lágrimas de Sangre.
Por supuestu, pola mor de la importancia que tien esti eventu cultural pal friquismu asturianu, vamos dir dándovos cuenta de toles novedaes que s’anuncien al respeutive.
