Pueque l’ésitu de John Wick (2014) lu causara que la protagonizara Keanu Reeves, l’alta cantidá de tortes y disparos o, quiciabes, l’argumentu tan llocu col qu’empieza la saga: qu’un paisanu que, resulta, tenía sío asesín profesional, se venga con una matancia tremenda de que-y maten el perru, el regalu que-y fizo la muyer xusto primero de morrer. Seya como fuera, el casu ye que tamos énte lo que yá ye un clásicu del cine, con trés continuaciones, una pondera en formatu de serie (The Continental) y otra como película que va estrenase nunos meses con Ana de Armas como protagonista (Ballerina). El mundu que tien construyío, con toa una sociedá atapada d’asesinos a sueldu, col so códigu irrompible, los sos abellugos y hasta la so moneda propia, foi a atrapar al públicu.
Bien, pos paez ser que nun ye eso tolo que se prepara, porque’l director Chad Stahleski (que ta detrás de tola saga) acaba d’anunciar que tamién tán en camín un anime y otra serie d’acción real, una que se centraría en L’Alta Mesa (el conceyu de los doce señores del crime). Sobre l’anime nun sabemos nada tovía, nin siquiera si la va protagonizar el mesmu John Wick o si lo que busquen ye enfocase n’otru personaxe.
Lo que ta claro, con trés series de televisión, Ballerina y, por supuestu, una quinta entrega de la saga, ye que tenemos universu de John Wick pa ratu. Tamién tien salío en videoxuegos y cómics, y hai figures d’acción suyes ente les que s’alcuentra una de más de quinientos euros. El personaxe ye, yá, ún más de la mitoloxía posmoderna.
