Al estilu de Star Wars: Visions, o tamién de Love, Death & Robots na competencia, Disney+ ta a puntu d’estrenar (yá en nada, el cinco de xunetu) una antoloxía d’animación, nomada Kizazi Moto: Generation Fire, con una temática hasta agora mui poco vista: el futuru d’África talamente como lo ven los sos pobladores.
Y ye que ye cierto que, allá polos setenta, al rau de la blaxploitation (el cine dirixíu a públicu negru) dellos autores afroamericanos empezaron a escribir una fantasía soul and sword (alma y espada), lo que sedría una versión de la espada y bruxería garrando elementos de les cultures africanes en cuenta de les europees. Quiciabes la obra más conocida ye Imaro (1981) de Charles R. Saunders, con un protagonista que tien dellos asemeyos con Conan. Años más tarde apaeció lo que se llamó “afrofuturismu” o “ciencia-ficción negra”, que magar el nome tampoco nun tienen problema en garrar elementos más fantásticos o propios del realismu máxicu. Agora, quiciabes porque la Wakanda Black Panther abrió esta puerta al cine y la televisión (¿nun ficiera quiciabes yá lo mesmo nos sesenta, colos cómics?), Disney apuesta por esta serie nueva na que distintos autores africanos van contanos hestories sobre’l futuru d’Exiptu, Kenia, Nixeria, Zimbabue, Uganda y, sobre manera, Sudáfrica, pos cinco de los episodios van ambientase nesti país. Al cargu de l’antoloxía ta Peter Ramsey (co-direutor de Spider-Man: Into de Spider-Verse) y el principal estudiu, encargáu de más episodios, ye Triggerfish, que yá tien feches trés películes d’animación 3D. Eso sí, los capítulos de la serie nun queden namás nesta, y como podéis ver nel avance que vos enllazamos equí, hai estilos pa tolos gustos.
