¿Cuántos grupos canten n’asturianu n’Asturies? La entruga ye difícil de responder. Sobre too porque’l númberu de grupos qu’hai nun suel coincidir col númberu de discos que salen cada añu (raru ye’l grupu que saca un discu al añu). D’ehí lo ablucante de les cifres cuando vemos que l’anuariu de la música asturiana, cuenta que namás nel añu pasáu, 2019, asoleyáronse 35 discos n’asturianu… …nun país d’un millón d’habitantes.

Esto dexaría les cifres nun discu por cada 30.000 habitantes al añu; lo que ye una cantidá mui bultable. Sicasí, nun ye tanto la cantidá – que ye impresionante – lo que llama l’atención del Anuariu de la Música Asturiana; sinón la calidá y la variedá de los artistes qu’asoleyaron obres nel añu que ta a piques d’acabar.

Vida más allá del folk

Anque’l folk, la tonada y lo que se vieno en llamar “música celta” sigue siendo una de les grandes partes de la producción de música n’asturianu (Un xéneru onde l’asturianu ye práuticamente la única llingua de producción musical n’Asturies); y probablemente seyan grupos de folk los meyores en calidá artística y musical n’Asturies y los que más discos venden; ye d’agradecer ver cómo l’asturianu val pa usase n’otros xéneros estremaos o como, inclusive, la llingua ponse al serviciu del remocique d’estos xéneros, como pasó con “Manual de Cortejo” de Rodrigo Cuevas o’l Post Folk asturianu de L-R.

La música n’asturianu en dellos datos.

Tamién, destaca la presencia del Pop con cantantes como Silvia Quesada, que yá lleva tres d’ella una bona trayeutoria o les propuestes más innovadores como les que l’añu anterior fixere Xaime Martínez con “Ósculos d’Agua nel Imperiu Asturianu”. La bona salú de la música nel nuesu idioma paez que nun ye cosa namás d’Asturies, pos hai quien señala que tamos énte un pequeñu “surdimientu” musical en Llión, si bien ehí tamos falando d’una comunidá de falantes enforma más ruina que la d’Asturies. Como suxerencia pal Anuariu de la Música Asturiana, taba bien que pa próximos númberos tuvieren en cuenta tola música d’espresión asturiana, tamién la que se fai fuera de les fronteres polítiques y alministratives d’Asturies.

El Premiu al Meyor Cantar, el referente

Hebo un tiempu en que l’Academia de la Música facía una gala añal y, nella, entregábase’l premiu al meyor cantar n’asturianu. D’entós p’acá, el concursu que garró’l relevu d’aquel foi’l Premiu al Meyor Cantar. Instituyíu en 2007, el concursu del PAMC lleva yá 11 ediciones escoyendo non solo al meyor grupu d’Asturies, sinón, tamién, al que va representar al nuesu país nel Festival Liet International, o, como se lu llama popularmente, “l’Eurovisión de les llingües minorizaes“.

Pues descargar equí de baldre l’anuariu de la música asturiana.

Leave a Reply

La to direición de corréu nun va espublizase. Los campos riquíos márquense con *