Bill Willingham, creador de Fables, una de les series más famoses de Vertigo (el sellu que DC tenía pa los cómics dirixíos a adultos) llevaba una bona temporada en llitixos cola editorial, pos polo que se ve nun-y paguen lo que-y deben pola esplotación de la so creación (en concreto, pol videoxuegu de Telltale basáu na serie, The Wolf Among Us). Tres un llargu procesu, y cansáu d’él, l’autor intenta que la cosa acabe agora d’una manera de lo más inesperada. Y ye que, nun poner los ****** sobre la mesa, Willingham anuncia que llibera los drechos d’autor de los sos personaxes, dexándolos en dominiu públicu y acabando asina con toa idea de DC de siguir aprovechándose d’él. Los drechos d’autor de la obra en sí mesma siguiríen siendo suyos (y espera cabar cobrando lo que DC-y debe), pero a partir d’agora cualesquiera podría utilizar los sos personaxes:
“Si entiendo la llei de manera correcta (y hai que tener en cuenta que la llei de drechos d’autor ye un desastre; intencionalmente vaga y turbia, y que nun hai dos abogaos, nin siquiera especializaos en drechos d’autor y drechu de marques, que tean d’alcuerdu en nada), agora tienes drechu a facer el to propiu “Fables”. Películes, dibuxos animaos, publicar los tos libros, fabricar xuguetes y facer lo que te pete cola propiedá, porque ye propiedá tuya.”
Por embargu, DC nun tardó en contradicir a Willingham, anunciando qu’eso nun ye asina:
“Los cómics y noveles gráfiques de Fables publicaos por DC, y les hestories, personaxes y elementos que contienen, son propiedá de DC, tán protexíos poles lleis de drechos d’autor de los Estaos Uníos y de tol mundu d’alcuerdu cola llei aplicable y nun tán en dominiu públicu. DC resérvase tolos drechos y va tomar les midíes que considere precises o apropiaes pa protexer los sos drechos de propiedá intelectual.“
Y ye que la saga ye bien preciada por DC, pos anque llevaben una temporadina ensin esplotala muncho, masque con ediciones nueves de material anterior, apocayá empezaben a facelo con hestories como un crossover d’ún de los personaxes, Bigby (el Llobu Feroz) con Batman. Queda por saber cómo se resuelve la cosa, pero esto pelo menos va quedar como un fitu históricu más na llarga batalla ente autores y editoriales americanes, que tienen vezu de nun tratalos tan bien como ameriten.
Fables foi una serie ñacida en 2002 y que protagonizaben los personaxes clásicos de cuentu, pero viviendo nel mundu real. L’argumentu empieza col Llobu Feroz, agora detective, investigando l’asesinatu de la hermana de Blancañeves. Nun dexaría de ser irónicu qu’unos personaxes que vienen del dominiu públicu ficieren un llargu viaxe pa depués volver a él.
