La esitosa editorial asturiana HT Publishers ta preparando novedaes a esgaya, y estes son les que güei mesmu anuncia que va sacar, si nada nun-y lo impide, pa 2023. Agarráivos y sacái la llibretina, ¡que nun son poques!
Savage Worlds: Anuncien nada menos que cuatro guíes de xéneru nueves pal sistema de rol estrella d’HT. Una ye de fantasía (yá seya alta, urbana, escura o histórica), una cyberpunk (Interface Zero 3.0), otra treshumanista (Walküre Salvaje 2075) y una más de superhéroes (con regles, una galería de villanos y semientes d’aventura). Rellacionáu con esta cabera, amás, preparen el suplementu Historias de la guardia condenada, cinco aventures a les que se pue xugar mesmamente ensin la guía de superpoderes. Per otru llau, la versión de Pathfinder adautada al sistema Savage Worlds va contar con una guía avanzada del xugador, asina como con cuatro entregues más de la sienda d’aventures Auge de los señores de las runas, y tamién l’empiezu d’una segunda, La maldición del trono carmesí. Ah, y tamién preparen con esti sistema una minicampaña protagonizada por muyeres victorianes, La liga de damas extraordinarias, y ¿Quién anda ahí?, una aventura d’horror y ficción científica. Ta claro que la cosa vien potente.
Deadlands: El xuegu de rol de weird western (esto ye, salvaxe oeste con ambientación fantástica) va contar con col suplementu El infierno de las Grandes Llanuras, que describe con más detalle los estaos de Wyoming y Colorado y incluye hestories ambientaes nellos.
Scheherezade: Va estrenase l’esperáu xuegu de rol basáu en Les mil y una nueches que s’aprobó per aciu de micromecenalgu, asina como dos minicampañes pa esti: La caravana de las cinco estrellas, na que los xugadores han percorrer un desiertu que nun ta tan ermu como pue paecer nun principiu, y La historia del genio y del espejo, ambientada na llexendaria ciudá de Basora.
Wargames:Gaslands: Repostado ye una reedición d’un xuegu de carreres posapocalíptiques al estilu de Death Race. Y Little Wars ye un xuegu desendolcáu por H. G. Wells en 1913 y que HT traye de vuelta agora con una edición clásica. Pal xuegu de fantasía Frostgrave preparen un suplementu, El Rey Rojo, y pal so hermanu d’engarriaes espaciales, Stargrave, preparen tamién Cuarentena 37, que promete tresfondos, poderes y doce escenarios nuevos. Y comenten qu’e, si-yos avaga, nun va ser l’únicu suplementu que van asoleyar pa esti.’igual tovía sal dalguna sorpresuca más pa esti caberu.
Rol en vivo: A esti respeutive, la editorial prepara La herencia del don, con un motor de cartes del que prometen que destaca la rexugabilidá, y Misterios de Arkham, d’ambientación lovecraftina.
¡Y muncho más!: La verdá que son tantes coses que nun podemos aparanos con detalle a falar de toes. Sí podemos contavos que tán preparando coses como Cuentos extraordinarios, un xuegu de Martin Lloyd pensáu pa xugar a rol con neños, Lemindianos, xuegu paródicu de fantasía, Roma 44 a.C., na antigua Roma, Renacimiento Haguruma, d’ambientación steampunk, suplementos pa El sueño de Cthulhu y Enseñanza Mágica Obligatoria, un xuegu de cartes y la reedición del de miniatures de Sphere Wars…
Y si acaso tovía nun vos sentís abrumaos, tenéis más información na páxina de la mesma HT Publishers calcando equí.
