Tiense muncho falao, inclusive nesti portal (dexámosvos l’enllaz equí) sobre’l conflictu esistente ente Stan Lee y los dibuxantes de Marvel, pos estos consideraben que Lee s’atribuyía méritos escesivos sobre l’autoría de los personaxes que co-creaben xuntos. Hai quien diz hasta que Stan Lee nun yera más qu’un editor, pos davezu entregáben-y les páxines colos diálogos puestos y too, y qu’él namás proponía dellos cambios. Amás, como los personaxes acababen perteneciendo a la editorial y namás Lee paecía beneficiase d’ello, en tanto que cargu relevante de la compaña, a lo llargo de les décades y más agora, al volvese franquicies multimedia multimillonaries, nun ye raro que salguen crítiques a esta apropiación que pelo menos en dellos casos ye bultable.
Jack Kirby, co-creador de series y personaxes como The Fantastic Four, The X-Men, The Incredible Hulk, Iron Man o The Avengers (por solo mentar unes poques) yá chocó con Lee nos años setenta por esta causa, y naquella marchó a DC pa nun volver a Marvel hasta que Lee vivía en Los Ánxeles, ocupándose de les adautaciones a cine y televisión. Agora, cola estrena en Disney+ d’un documental sobre Stan Lee, narráu por él mesmu, la familia de Kirby nun pue aguantar callada y la ñeta d’esti, Jillian Kirby, acaba d’espublizar una carta de so pá, Neal Kirby, na que desfuega sobre lo qu’opina. Podéis ver la carta orixinal calcando equí, pero dexámosvos darréu la traducción al asturianu. Nun vamos comentar nada al respeutive, yá que queremos más que xulguéis por vós mesmos:
“El poeta y erudito islámicu del sieglu XIII, Rumi, dixo: “L’ego ye un velu ente los humanos y Dios”. Na biografía documental de Disney+ de Stan Lee llevántase’l velu. Presentáu en primer persona cola voz de Lee, narrando de contino, ye’l mayor tributu de Stan Lee a sí mesmu. La espresión lliteraria d’ego ye’l pronome personal “yo”. Cualesquier profesor decente d’inglés o periodismu recomendaría a los alumnos que nun lu usen por demás. Entós, el desafíu úfrese a cualesquiera que desee contar el númberu de “yos” nos 86 minutos de tiempu de Stan Lee.
Yo (¡ui!) entiendo que, como un “documental sobre Stan Lee”, la mayor parte de la narración ta na so voz, de manera lliteral y figurativa. Nun ye un gran secretu que siempre tien habío controversia sobre quién xugó qué parte na creación y l’ésitu de los personaxes de Marvel. Stan Lee esfrutó de la circunstancia afortunada de tener accesu al megáfonu y los medios corporativos, y usólos pa crear un mitu propiu sobre la creación del panteón de personaxes de Marvel. Fízose la voz de Marvel. Asina, en delles décades foi “l’únicu” home en pie y, bendicíu con una vida llarga, l’últimu home en pie (mio pá morrió en 1994). Tamién ha tenese en cuenta, y davezu acéutase, que Stan Lee tenía un conocimientu escasu d’historia, mitoloxía o ciencia.
Per otra parte, el conocimientu de mio pá sobre estos temes, del que yo y munchos otros podemos dar fe personalmente, yera importante. Einstein resumiólo meyor; “Más conocimientu, menos ego. Menos conocimientu, más ego”.
Si mirares una llista y una cronoloxía de los personaxes de Marvel dende 1960 hasta 1966, el periodu nel que se crearon los más de los personaxes principales de Marvel a lo llargo del mandatu de Lee, vas ver el nome de Lee como co-creador en cada personaxe, sacante Silver Surfer, creáu solo por mio pá. ¿Hemos suponer que Lee participó na creación de tolos personaxes de Marvel? ¿Hemos suponer que l’otru co-creador nunca entró na oficina de Lee y dixo: “¡Stan, tengo una ideona pa un personaxe!” Según Lee, siempre foi idea d’él. Lee pasa bastante tiempu falando de cómo y por qué creó a Los Cuatro Fantásticos, con solo una referencina rápida a mio pá. De fechu, la mayoría los historiadores de cómics reconocen que mio pá se basó pa Los Cuatro Fantásticos nun cómic de 1957 que creó pa DC, Challengers of the Unknown, y hasta llamó a Ben Grimm (The Thing) n’honor a so pá Benjamin, y a Sue Storm n’honor a mio hermana mayor, Susan.
Anque’l conflictu ente Lee y mio pá al respeutive de los creitos de creador se pasen penriba ensin mentalu, ponse más atención na disputa entre Lee y Steve Ditko, cola voz de Lee proclamando: “Foi idea mía, conque creé’l personaje”. La refutación de Ditko ye que foron el so arte y historia los que dieron vida a Spider-Man. En 1501, la Ópera del Duomo encargó a Miguel Ánxel, de ventiséis años, qu’esculpiera una estatua de David pa la Catedral de Florencia: la so idea, el so dinero. La estatua llámase’l David de Miguel Ánxel: el so xeniu, la so visión, la so creatividá.
Fui mui afortunáu. Mio pá trabayaba en casa, nel estudiu del suétanu en Long Island al que nos referíemos como “La Mazmorra”, davezu de catorce a dieciséis hores diaries, los siete díes de la selmana. Los más de los dibuxantes, escritores, entintadores, etc. trabayaben en casa, non nes oficines de Marvel como se muestra nel programa. Tando en secundaria y la preparatoria podía poneme tres del costazu izquierdu de mio pá, mirar al traviés d’una ñube de fumu de puru y presenciar la creación del Universu Marvel. Pa nada soi un historiador de cómics, pero hai pocos, si ye qu’hai dalgún, que tenga visto o esperimentao en persona lo que yo, y que sepan de la verdá con conocimientu de primer mano.
Mio pá retiróse de los cómics a principios de la década de 1980 y, claro, finó en 1994. Lee tuvo más de trenta y cinco años de publicidá irrebatible, naturalmente col sofitu y la bendición de Marvel, yá qu’impulsó la marca Marvel como efeutu secundariu d’impulsase él mesmu. Les décades d’autopromoción de Lee terminaron coles sos apaiciones especiales en más de trenta y cinco películes de Marvel, escomenzando con X-Men nel 2000, afitando asina la so condición de creador de tolo rellacionao con Marvel pa una audiencia de millones d’espectadores que, d’otra manera, desconocíen y nun taben familiarizaos cola historia verdadera de los cómics Marvel. El primer creitu de mio pá na pantalla nun apaeció hasta’l final de l’adautación cinematográfica d’Iron Man en 2008, depués de Stan Lee, Don Heck y Larry Lieber. La batalla polos drechos del creador esisten dende la primer tablina babilónica con inscripciones. Yá ye hora de, pelo menos, entender correutamente esti capítulu de la historia del arte/literatura. Too dicho (nel orixinal ‘Nuff said, espresión típica de Stan Lee).”
