Quiciabes yera cuestión de tiempu, pero yá llega’l momentu al que munchos coleicionistes-y teníen mieu. De mano, ye n’Australia onde Disney nun va sacar más películes en formatu físicu, siendo Guardians of the Galaxy Vol. 3 la última que va vendese nesti formatu. Nin DVD nin Blu-Ray, nunca enxamás (y, amás, cuando escose la primer edición nun van sacar una segunda). Ye de suponer que nos próximos años, sinón nos próximos meses, vaya aumentando la llista de países nos que van facer lo mesmo.
Y ye verdá que ye un formatu que nun ta a la moda, les más de les cases yá nun tienen nin aparatu pa lleelos y ye probable que nun seya rentable sacar les películes pa él. Vivimos n’otros tiempos, pa desgracia de los coleicionistes. Pero esta maniobra tien implicaciones importantes acullá, porque a partir de la so aplicación namás podríen vese les películes na ñube, o na tele tradicional cuando les echaren. Nun vas poder poseyer una película de manera que la pueas apalpar, solo vas tener accesu a ella, yá seya al traviés de la compra en formatu dixital o al traviés de la cuota d’una plataforma de streaming. Y la compra, como se vien demostrando los últimos años con otros artículos como los videoxuegos, nun ye nunca una compra verdadera, yá que les compañes se guarden nes cláusules poder borrales si quieren facer espaciu nos sirvidores, o por cualesquier otra razón que-yos pete. Inclusive, como tien pasao colos llibros de Roald Dahl a los incautos que los compraren pal ebook, un día pues alcontrar que tres d’una actualización hai modificaciones pa facelos políticamente correutos y yá nun tienes nin pues tener accesu a la obra orixinal (cosa qu’asocedió apocayá y vos contemos equí).