Agora qu’Asturies llega a les últimes fases de la política de vacunación xeneral escontra’l covid, en Refuelgu quiximos facer un repasu de cuála ye la hestoria de les vacunes. ¿Cómo surdieron? ¿Cuáles foron les primeres? ¿Cómo yeren enantes? Lo cierto ye que la propia estructura de les vacunes cambió muncho dende los primeros tiempos nos que se punxeron. D’esti mou, nuna primer dómina, les vacunes nun yeren más que virus más febles que s’inyeutaben nel organismu pa que los anticuerpos llucharen escontra ellos “con ventaya” y la xente pudiere desendolcar les defenses. D’esti mou, pasábase la enfermedá en “mou fácil”. La viruela foi una de les primeres enfermedaes escontra les que se lluchó d’esta manera. Foron los chinos, nel sieglu XV, los primeros qu’emplegaron estes práutiques surniando postielles.
En 1796 Edward Jenner da un pasu más alantre na vacunación. Descubrió que les vaques tienen una “viruela bovina” que ye una variante más feble de la viruela humana. Lo que fai entós, ye inocular a un guah.e con esi virus y depués, en recuperándose de la enfermedá, inocúla-y viruela humana. Sorprendentemente’l neñu nun desendolca nengún síntoma y vuélvese inmune dafechu a la viruela humana.
Más alantre, la segunda xeneración de vacunes aportó col francés Louis Pasteur que desendolcó vacunes pal cólera aviar y l’antrax. Pa faceles, atropó un conxuntu d’animales y metió-yos unes variaciones más febles del virus. Depués, en pasando unos díes, metió-yos una variedá más fuerte del mesmu virus, emplegando un grupu de control d’animales (de delles especies) que nun teníen tratamientu. Los resultaos amosaron que tolos animales vacunaos sobrevivieron mientres que tolos non vacunaos morrieron. Como consecuendia d’esta esperiencia y tamién n’homenax a Jenner, que tamién emplegare les vaques, Pasteur escoyó’l nome de “vacuna” (basáu na pallabra llatina vacca).
A últimos de XIX desendólquense más vacunes escontra otres munches enfermedaes y aprúebense les primeres lleis qu’obliguen a la vacunación de la población. Créense asina los calendarios y cartíes de vacunación, que recueyen y apunten toles vacunes qu’una persona recibe, de mou y manera qu’a la hora de tratala, sepian yá los médicos qué hai que-y alministrar y qué non. Tocantes al desendolcu de les estremaes vacunes, nuna primera fase nel sieglu XIX descúbrense y vacúnase efeutivamente escontra’l tétanos, la difteria y la peste. Pero’l trabayu de descubrimientu nun fina equí, y los científicos y investigadores diben siguir descubriendo vacunes a lo llargo del sieglu XX, dacuando pa enfermedaes perestendíes y peligroses como la tuberculosis. Amás d’ella, nel sieglu XX pónse-y remediu per aciu les vacunes a la tos ferina, la fiebre mariella, la polio, les papeles, el sarampión, o la hepatitis. No que va de sieglu, descubrióse la vacuna del VPH, l’ébola, la hepatitis C y, a lo último, la covid, de la que tamos toos perinformaos.
