ROM, the Space Knight ñació nos años setenta como un moñecu electrónicu, o una figura d’aición, como se suel dicir agora pa nun ofender. Hasbro compró los drechos del xuguete (podéis ver l’anunciu orixinal del xuguete calcando equí) y tuvo la idea de ceder a Marvel la llicencia pa facer cómics del personaxe, produciendo una sinerxa pa que los veceros d’ún se volvieren en veceros del otru. Los cómics diéron-y al personaxe una hestoria, convirtiéndolu nun cyborg estraterrestre que vien d’una sociedá utópica pa enfrentase a unos invasores conocíos como “les pantasmes espaciales”. Los cómics de Bill Mantlo y Sal Buscema son anguaño muncho más recordaos que’l moñecu, pos se convirtieron nun gran clásicu de los ochenta. Por embargu, llegó un momentu nel que la llicencia venció, y los cómics quedaron nun llimbu del que yera imposible sacalos pa republicalos. Nun enguedeyu tremendu de drechos d’autor, la editorial IDW consiguió sacar unos cómics nuevos del personaxe en 2016, pero la cosa nun duró muncho.

Agora, Marvel anuncia lo que munchos aficionaos esperaben d’amunchayá, y ye que consiguieron facese colos drechos pa publicar de nueves, en collaboración con Hasbro, tola coleición orixinal: setenta y cinco númberos más estres, no que mui probablemente sedrán trés grandes volúmenes. Y puesto que Panini fizo ecu de la noticia insinuándola en redes inclusive primero d’asoleyase, podemos dicir con cuasi total seguranza que tamién van vese publicaos en castellanu.

Sobre si esta collaboración va trayer cómics nuevos del personaxe (o inclusive películes, cosa de la que se faló va unos años), o si acaso tamos énte una estratexa nueva na que la editorial quier recuperar llicencies antigües, ye dalgo que tovía nun sabemos, pero los marvelómanos yá suañen cola recuperación y reedición d’otres como foron Micronauts, Shogun Warriors, G.I. Joe o Godzilla.

Leave a Reply

La to direición de corréu nun va espublizase. Los campos riquíos márquense con *