Llevamos yá dellos reportaxes falando de la vuelta a la normalidá y los eventos. Nos tres caberos meses de 2021 ye ónde más convenciones se tán arrexuntando, pola relaxación de les midíes pa la COVID y l’avance de la pauta de vacunación y la gana de xente de volver a la normalidá na midía de lo posible.
Los díes 10, 11 y 12 d’avientu foi los díes escoyíos pa facer la Market Freak Lleón, que yá tuviera delles ediciones enantes de la COVID. Fízose nuna de les zones del Palaciu d’esposiciones y congresos de Lleón y ufrió una estaya abondo curiosa d’actividaes venceyaes a lo friqui y al entretenimientu alternativu.
Como ye habitual nesti tipos de convenciones, nun faltó’l cosplay nin el k-pop. De sábadu fízose’l concursu de converdance (y tamién el de karaoke) y de domingu fízose’l concursu de cosplay (que na mayor parte consistió nuna pasarela), na qu’algamaron el primer y segundu premiu dos cosplayers asturianes: Shirai Kuroko y Shironekozz.
La convención tuvo como invitaos de cosplay a los cosplayers lleoneses Tifa Flynn, Mizuky San, Exerbrang Works y Anffeith, y a l’asturiana Shiroychigo. Toos ellos tuvieron un puestu de prints, onde amás podíes averate a conocelos.
Tamién tuvieron invitaes les baillarines de k-pop Marianna Off y Lucihae, del grupu Off Wild, que dieron charres y delles exhibiciones, una d’elles nel Black Bourbon, onde había una fiesta de nueche en collaboración col eventu.
Otra de les novedaes ye que había un fotógrafu con una carrera bien fondera faciendo fotos bien curioses: Dioxcorp.
Amás, la convención tamién tuvo como invitaos a la ilustradora Shaun Elay, que tien una montonera d’ilustraciones d’una calidá ablucante. Esta ilustradora amás tien un estilu personal y failo en negativu y en direutu, demientres que’l públicu pue ver los colores de la so obra al traviés del móvil.
Presentaciones d’ecritores
Tamién hebo dellos escritores que presentaron la so obra, firmaron y ficieron un alcuentru colos llectores, ente ellos Lord Migeru, Sandra de Luca o Margoth Costa.
No que cinca a la zona comercial, la organización puxó, como venía faciendo otres ediciones, polos puestos d’artesanía, onde dibuxantes y otra mena d’artistes de distintos sitios d’España, vendíen les sos obres a tol públicu asistente.
Nun había momentu p’aburrise, yá que podíes asistir a una montonera de charres y talleres de toa mena: dellos venceyaos al dibuxu y la creación artística (como’l de Introducción básica al color y téuniques manga de l’asturiana Nekhuro) o lliterarios (como foi’l casu del de Creación de personaxes de Kenji Wolfman). Tamién se podía xugar a dellos Videoxuegos nuna zona especial pa ello, amás de competir nos torneos.
Amás, asistieron delles asociaciones venceyaes a la temática, como la Orde de Revan, una asociación benéfica de temática venceyada a Star Wars; o l’Asociación ALTARF, especializada en multiaventura.
L’eventu ta organizáu pola asociación Lion Freaks, que yá tien planes de siguir faciendo más eventos de la mesma Mena en Lleón y Zamora. Esperemos que l’añu viniente con más sofitu del Ayuntamientu de Lleón.
