Féxose equí, yá va un tiempu, un artículu que repasaba la hestoria de les banderes asturianes, tanto actuales como hestóriques, mesmo oficiales que non, y en xeneral ye un artículu mui completu que recomiendo a tolos lleutores, pero nesa antoloxía vexilolóxica falta una, una bandera de la que llevo buscando evidencia fotogrática dende va un tiempu, ensin ésitu, pero de la que dan bona fe les referencies que d’ella se faen na prensa asturiana del momentu. Pero ¿De qué momentu, de qué dómina toi falando? De la segunda metá del sieglu XIX, concretamente de la I República Española, proclamada l’once de febreru de 1873.
Y ye que n’aquellos años dominaba’l panorama republicanu n’Asturies el partíu de don Francesc Pi i Margall, al que yá me referí delles vegaes y voi siguir faciéndolo, y esta formación yera mui prolífica en símbolos y banderes y nun diseñaron solo enseñes pa usu propiu, ye dicir, enseñes del partíu (que son tamién interesantes), sinón que consideraron que si dalgún día’l Cantón Asturianu diba ser una realidá tenía que tener una bandera propia, y allá que foron a diseñala. N’efeutu, los federales asturianos, viendo que s’acercaba la república federal (proclamada oficialmente en xunu d’esi añu, anque n’Uviéu la interina Balmori yá la proclamare énte la masa exultante el 12 de febreru) decidieron facer una bandera pal Estáu Federal y non solo la proyeutaron, sinón que llegaron a cosela y a escolingala nel balcón de la Casa Conceyu Uvieína, cosa que nun prestó un res a ciertos seutores de la sociedá asturiana, como amuesen les crítiques que n‘El Eco de Asturias faen de tal ocurrencia.
D’esta bandera, como digo, nun se conserva, o a lo menos nun teo noticia d’ello, nin semeya nin dibuxu nin exemplar dalgún, pero sí descripciones que d’ella se faen y, cómo non, taba basada na nuesa bandera d’anguaño, la bandera que Xovellanos diseñare pa que los asturianos pudieran llevala arguyosos na guerra escontra’l francés. Según Benito Canella yera una bandera coloroda na que «se veía en campu azul […] la cruz de Pelayo».
Dicha enseña esnaló penriba les cabeces de los uvieínos hasta que la República Federal vieno a la so fin, mas ye presumible que los federales siguiríen usándola, polo menos los d’Uviéu, anque como digo nun teo evidencia pa ello. Y, quién sabe, a lo meyor, de salir alantre la Constitución Federal Asturiana de 1883, ésta sedría la bandera asturiana d’anguaño…
Posibles diseños:
