La compaña d’asesoría financiera Bloomberg comunicó ayeri (nuna noticia que podéis lleer calcando equí) que Netflix España tien perdío más d’un millón de soscriptores namás dende febreru, cuando empezó a aplicar la polémica política d’empresa “una cuenta, un llar”. Esti foi ún de los primero países nos que lo fizo, anque’l so plan ye (o yera), como anunciara va tiempu, facelo pronto en toos. L’enfadu y el xaréu foron notables el día qu’empezó a aplicase y los siguientes, cuando los usuarios descubrieron que nun podíen acceder a la plataforma; en parte porque yera la mesma Netflix la qu’hasta diba poco afalaba en redes sociales a compartir cuentes (masque nes condiciones de soscripción ñegaben esta posibilidá), en parte porque un gran númberu de clientes pagaben la cuota a paches pa tenela en dos llares al empar, y tamién en parte porque dellos soscriptores que se diben de vacaciones, o qu’a cencielles víen programes en móvil, principiaron a alvertir problemes de conexón. Esto entemecióse, tamién, colos enfados producíos pola cancelación de delles series, y una campaña en Twitter pidió dase de baxa como quexa. Agora, de manera sorpresiva, munchos usuarios dicen poder entrar dende distintos llares ensin problema, conque paez que Netflix reculó o, pelo menos, frenó l’avance de l’aplicación d’esta midida.
El casu ye, de toles maneres, que Netflix España andaba en 2022 nos 9,6 millones de soscriptores, y en namás dos meses tien perdío más d’un diez por cientu d’ellos. Resulta evidente que, pelo menos a plazu curtiu, la midida nun salió como esperaben, pos la idea yera aumentar el númberu al facer que se soscribieren los que esfrutaben del serviciu a nome d’otra persona (según calculen, más de cien millones en tol mundu). Por embargu, dende Netflix dicen confiar en que ye dalgo temporal, pola mor del enfadu nel cambiu de condiciones, y que pronto van recuperar y aumentar el númberu de clientes como yá pasó, aseguren, en Canadá. Ye por ello que siguen colos planes d’esparder esta política a tol mundu, siendo los EE.UU. ún de los primeros países nos que van aplicala ceo.
Sicasí, esto, xunto a la recién superación d’Amazon en númberu de clientes a nivel mundial, nun señala (pelo menos de momentu) nada bono pa la que va namás unos años tenía cuasi’l monopoliu de la televisión en streaming. Vamos ver qué pasa.
