Nos mios artículos toi centrándome más nel “proto-asturianismu políticu” por considerar el so estudiu pernecesariu pa entender l’Asturies d’anguaño, siendo imprescindible sacalos del escaezu coleutivu nel que ta somorguiáu (¿Cuántes vegaes repetiría esta frase? Perdone’l públicu pola necesaria redundancia); pero nun ye xusto nin cabal dexar de llau sistemáticamente al asturianismu cultural, qu’anque tea más estudiáu sigue habiendo nél elementos bastante olvidaos como ésti del que voi falar güei. Consecuentemente vuelvo al alvetir al distinguíu lleutor que nun atopará muncha información amañosa al rodiu d’esta institución que voi presentar agora, y créame l’audiencia cuando-y digo que me sorprende, precisamente por ser lo que foi esti muérganu cultural y polo qu’agora ye’l so heriede.
Precisamente esta institución tien muncha rellación col contestu d’axitación autonomista y asturianista del primer terciu del sieglu XX que yá comentamos perequí y amuesa claramente que’l nuesu idioma tien una identidá bien afitada nel pasáu; y ye qu’esos años, los primeros de la centuria cabera, foron d’una gran vitalidá pal asturianu. Ye la dómina del primer periódicu n’Asturianu, Ixuxú (un nome bien guapu y espresivu ¿Nun ye verdá?), del teatru asturianu de Pachín de Melás, de Fernán Coronas, de Pín de Pría… Yá nun taben grandes nomes como Xuan María Acebal, “Príncipe de los Poetes”, o Teodoru Cuesta, pero l’estudiu y cultivu de la nuesa llingua, abellugáu baxo l’ala del rexonalismu qu’entamaba a aprucir nesa época (o seique al aviesu), taba a la orde del día y nel mesmu añu que la diputación y munchos ayuntamientos sancionaben propuestes d’autonomía, que yá vimos equí, axuntábense en Xixón una riestra de personalidaes pa cumplir ún de los suaños de Xovellanos y de tantos otros próceres del asturianismu cultural: Formar una academia de la llingua asturiana.
Sí, una academia de la llingua asturiana, la Rial Academia Asturiana de les Artes y les Lletres, que tenía por divisa “Investiga, Conserva y Purifica” y como enseñes privatives de los académicos una montera picona de terciopelu prietu bordada con gansa d’oru y un medallón nel qu’apaecía la Cruz de la Victoria, nel anversu, y una antorcha cola conseña dicha nel reversu (Nun sedría mala cosa que l’ALLA recuperare estes enseñes ¿Nun creen?). Según los sos estatutos espublizaos en dellos númberos del periódicu El Regionalista Astur1, tenía por oxetu “El cultivu, espardimientu y conservación del nuesu idioma rexonal; la espublización d’un Diccionariu y una Gramática bables y la creación d’un teatru rexonal” (escrito en castellán, eso sí). Al paecer formóse’l día 10 de febreru del añu 1919, como afirmen nel primer númberu d’El Regionalista Astur, y tuvo una mui bona acoyida (el periódicu también esplubizó cartes y telegrames felicitando a los académicos pol so llabor), recibiendo esi mesmu añu’l patronatu rexu y la presidencia honorífica del entoncies Príncipe d’Asturies Alfonsu Píu Cristinu Eduardu de Borbón y Battenberg (hermanu mayor del Conde de Barcelona y tíu de Xuan Carlos), que cuntaba n’esi tiempu con solo 12 años.
Una academia con presencia de muyeres
N’El Rexonalista Astur atopamos tamién nomes de dellos académicos, qu’anque son tolos que tán nun tán tolos que son; pues yeren 30 en total, según los estatutos (eso académicos de númberu, porque tamién había honorarios)
Don Eustaquiu Abá.
Don Xosé González y García (Pín de Pría).
Don Fabriciano González y García
Don Moisés García Fernández.
Don Wenceslao García Canal.
Don Víctor Cifuentes Díaz.
Don Manuel Antuña.
Don Ánxel de la Viña
Don Carlos Cinfuegos Xovellanos
Don Álvaro Fernández de Miranda, vizconde de Campu Grande.
Doña Carmen Álvarez Teyera y Xove, vizcondesa de Campu Grande
Don Emiliu Robles Muñiz (Pachín de Melás).
Don Alexandru García Álvarez, secretariu.
Don Francisco González Prieto, bibliotecariu.
Don Calisto de Rato y Roces, presidente.
Amás nun artículu nomáu “Maravayu”, asoleyáu nel segundu númberu del periódicu indicáu, planteguen tamién como académicos corresponientes (estremaos de los de númberu) a Eva Canel, Luisa Castellanos, Xulio Somoza, Marcos del Torniello, Constantín Cabal, o, y cito testualmente, “el fíu de don Baldomero el que compunxo y aperió el Dicionariu del bable” (nun pudi identificar nin al fíu nin al proxenitor) y como honoríficu a Fermín Canella y Secades, anque nun pueo confirmar que se-yos confirmare como tal.
Con una bona organización, pero que nun llegó a producir resultaos
Según los sos estatutos l’Academia taba dividida en cuatro seiciones, una integrada pola Academia al completu dedicada a la fechura d’esa Gramática y Diccionariu y a la espublización d’una revista orgánica de l’Academia, y les otres tres, compuestes por 5 miembros caúna, habíen ocupase de la poesía y lliteratura n’asturianu, de la dramaturxa asturiana (y creación d’un Teatru Rexonal) y de la música popular asturiana; magar que nun pudi atopar noticia de los trabayos que fixera o non l’Academia en dengunda d’eses estayes (pa variar nel mundiu del asturianismu, si vs. m’entienden).
Aconceyaba la Serenísma Academia Asturiana d’Artes y Lletres (asina ye como la llamen n’El Rexonalista Astur) nel Rial Institutu Asturianu y teo noticia de la sesión d’apertura, el día 11 de febreru, como dixi, y d’otres esi mesmu añu como la del 27 d’abril de 1919, pero más alló de 1921 nun teo más información sobro l’Academia, anque paez que sirvió de niciu pal trabayu individual d’autores como los nomaos Pachín de Melás, Pín de Pría, Rendueles y tamién pal IDEA, del que yeren miembros munchos antiguos académicos.
¿Cuándo cesó l’Academia? ¿Por qué? ¿Ónde quedaron el Dicionariu y la Gramática Asturiana? ¿Qué fixeron les comisiones? ¿Habrá un diariu de sesiones n’algún riconín d’Asturies esperando a ser descubiertu? En fin, son entrugues ensin rempuesta (vaya novedá nos mios artículos ¿Nun ye verdá?), pero una cosa sí podemos dicir d’esta institución: Que ye un precedente claru de l’Academia de la Llingua Asturiana y qu’amuesa que l’asturianu tien una tradición de cultivu y estudiu bien estensa nel tiempu y qu’anque d’oxetivos y actuaciones más llimitaos pol propiu contestu asturianu de la dómina pue comparase con dignidiá con otres llingües del Mundiu y de la Península. Solo fai falta recorder, por exemplu, que la Real Academia de la Llingua Vasca formóse solo un añu enantes que la de nueso.
Muérganos como estos amuesen que l’asturianu nun ta nin tuvo nunca muertu y que’l deséu de sacalu del arrequexamientu nel que se vio recluyíu tampoco nun ye un caprichu vanu d’estos tiempos modernos, sinón una reivindicación hestórica bien afitada, como dixi, nel nuesu pasáu.
L’ALLA espublizó una edición facsímil mui amañosa de los 14 primeros númberos del periódicu.
