Esti 2 d’ochobre volvió a celebrase’l Día de la Reciella nel Muséu del Pueblu d’Asturies. Toos taben naguando pola que foi la so VIII edición y tres que nun se pudiera facer pol aciu del coronavirus en 2020.
Pa los y les que nun sepáis lo que ye’l Día de la Reciella, ye una celebración naque a lo llargo d’un día pas y más colos fíos y fíes puen asistir a una montonera d’actividaes n’asturianu. L’envís ye poder celebrar un día que combine l’entrenimientu cola normalización de la llingua asturiana. Dende va delles ediciones el Día de la Reciella tien una canción, qu’esti añu foi “L’asturianu sal con nós”, compuesta pol músicu y escritor Xaime Martínez. Dende les 11.30 hasta les 19.00 hebo actividaes ensin parar, polo que yera imposible aburrise.
La Oficina de Normalización Llingüística de Xixón espublizó pa esti día’l Vocabulariu del Axedrez en collaboración col Club “Antonio Rico” y organizó una actividá d’averamientu con un de los miembros d’esti club: Belarmino García Suárez. Los neños y neñes tuvieron, amás de unos cuantos tableros pa deprender en pareyes, un tableru del so tamañu bien prestosu.
Tamién pela mañana hebo un cuadrín-exhibición de fútbol con neños y neñes del U.C. Ceares, comentáu n’asturianu por Pelayo Rodríguez, presentador del programa La Xugada, na canal de Playpresta. Y foi tamién pela mañana cuando los asistentes pudieron ver una exhibición de valtu, que pa los que nun lo conozáis, ye un estilu de llucha tradicional d’Asturies y Llión que ta recuperándose y cada vez ta algamando más prauticantes.
La presentadora de Cosplaypresta, Shiroychigo, dio una charra nomada “¿Qué ye’l Cosplay?” empobinada pa que los asistentes conocieran esti hobby que cada vez tien más aficionaos. Dafechu, una de les asistentes, Catuxa, foi col cosplay d’un personaxe d’anime bien conocíu que se noma Umaru-Chan.
L’autor Aique Fernandi tuvo acompañando a la Reciella cola so última obra Lin xube a Carabín, y paez que-yos prestó abondo porque dalgunos hasta xubieron con él al escenariu. Nun ye d’estrañar viniendo del autor d’Invisible, Premiu Xosefa Canellada 2018.
La productora asturiana Cuatro Gotes collaboró como tolos años, esta vez grabando cola reciella mensaxes sol asturianu pal futuru, que tuvo muncha aceptación ente los neños y neñes, qu’amás amosaron tener un asturianu perguapu.
La música y la danza tuvo presente tol día del festival, con actividaes como un conciertu de la banda de neños y neñes El Gumial, una sesión de música y audivisual de Llevolu’l Sumiciu y la última actividá del día, foi un conciertu de Kikirikí con canciones pa neños y neñes, nel que tuvieron Alicia Álvarez y David Varela acompañaos de los asistentes.
Aparte de too esto, tamién había puestos, ente los que taben ún la Oficina de Normalización Llingüística de Xixón, la Tiendina de la Reciella, la editorial Pintar Pintar, la Xunta pola Defensa Asturiana y tamién d’Iniciativa pol asturianu, onde los asistentes podíen recibir información d’actividaes y iniciatives qu’hai pa la normalización del asturianu y mercar llibros, camisetes y pegadielles n’asturianu.
Toes estes actividaes tán coordinaes poles families de l’asociación Reciella: families pol asturianu, qu’organicen actividaes tol añu pa les families col envís de tresmitir y caltener la nuesa llingua. Ente les actividaes que faen, tamién entreguen les insignies de “Escuela Afayadiza” a les escueles que tienen un númberu altu de matriculaos n’asignatura de llingua asturiana.
Magar que l’añu pasáu nun se pudo facer de forma presencial, si que se fixeron delles actividaes en llinia que podéis atopar na canal de Playpresta “La reciella en casa: ¡La cuarentena presta!”, na que se fixeron dellos talleres, cuentacuentos y hasta un conciertu.
Quedáis convidaos a dir a la edición del próximu añu, y si vos apetez ver cómo foi esti VIII Día de la Reciella tenéis na páxina de la Revista Vërtigu toles semeyes que fexo Pablo A. Quiroga.
