¿Y si vos dicimos que’l llibru “La Regenta” ye too mentira? ¿Y si vos contamos que Leopoldo Alas “Clarín”, nun ye más qu’un axente propagandista qu’escribió l’archiconocida obra p’atapar l’enfrentamientu ente l’axente secreta Ana Ozores y Drácula? Ésta ye la premisa de partida de “La Rexenta contra Drácula”, la primer novela d’Adrián Carbayales y una de les premises lliteraries más orixinales de les nueses lletres.
La novela ambiéntase na conocida ciudá de Vetusta na seronda de 1882. Nesi momentu, el renomáu conde transilvanu ta corrompiendo a la sociedá vetustina a base d’orxíes, fiestes lloques y nueves idees que perturben los estándares d’orde y “ranciedá” de Vetusta. Pa evitar la corrupción que trai l’aristócrata estranxeru, La Fundación, la organización secreta a la que pertenez Ana Ozores (nome en clave “La Rexenta”), decide unviar a esta muyer pa enfrentase al vampiru. Gracies a los sos conocimientos, el personaxe decimonónicu de Clarín enfrentaráse al vampiru con cuchiellos, dagues, ayos, estaques, salmos, prótesis neumátiques y munchu remangu.
Una lliteratura con mercáu:
Ediciones Radagast, la editorial que ta detrás d’esta “ida de pinza” lliteraria, sacó esti llibru ensin sovención, cosa que suel ser rara nes publicaciones de narrativa n’asturianu, confiando en que la respuesta del mercáu seya positiva como lo foi nel casu de Depués d’Ochobre, Del Llau del Nigromante, L’Home les Caparines o Trovadoresca.
Enfrentamientu ente dos maneres de ver la lliteratura:
Pero Carbayales nun escuende que, detrás d’esti enfrentamientu míticu ente dos clásicos, hai tamién un enfrentamientu ente dos símbolos y dos maneres de ver y entender la lliteratura. “Nesta novela nun vas atopar namás l’enfrentamientu físicu ente los dos clásicos lliterarios sinón tamién l’alegóricu ente dos maneres d’entender la lliteratura. ¿Podrá la honorable y siempre tradicional Vetusta permanecer impasible cuando vea a Drácula profanar los sos principios más sagraos?” reza la contraportada nuna clara referencia a la resquiebra estilística y temática que se ve na lliteratura asturiana.
La polémica ta servida.
Si quies mercar el llibru, pues calcar equí:
