Too empezó con una serie de los ochenta sobre un hespital. Llamábase St. Elsewhere. Y anque nun ye una serie mui recordada, foi llamadero qu’acabara cuasi como’l suañu de Resines en Los Serrano: Nel postrer capítulu descubríase que tola serie asocedía na imaxinación d’un ñeñu autista, Tommy Westphall. Daquién entrugóse cómo yera, entós, que nun capítulu salieren dellos personaxes tomando unes cañes en Cheers, el chigre de a serie del mesmu nome, o que dos de los doctores salieren tamién en Homicide: Life on the Street. ¿Cómo ye, qu’eses series tamién asocedíen na cabeza de Tommy? Conque xente ocioso escomenzó a especular. ¿Hasta ónde llegaben eses conexones? Un personaxe de Homicide: Life on the Street, John Munch, fai cameos n’otra decena de series; una pondera de Cheers foi Frasier, y nesta serie sal una marca ficticia de tabacu, Morley’s, qu’apaez en más d’otres cuarenta series… La cosa esmánase pronto. ¡Cuántes coses cueyen na cabeza’l probe Tommy!

Como la xente s’aburre con facilidá, Google da 12.300 resultaos a tommy-westphall-universe, onde atopamos mapes enguedeyaos que xuncen series a esgaya (y tamién películes) o enciclopedies que rexistren cualesquier puntu de conexón. En X-Files, por casu, salen tanto’l yá mentáu John Munch como los pitos Morley’s (son los que nun apara d’echar el malu conocíu como El Fumador). Nesta serie, al empar, vemos una compaña d’alquiler de coches que tamién apaez en Supernatural, Breaking Bad o Veronica Mars, y los axentes Mulder y Scully investiguen un casu en Springfield nun episodiu de The Simpsons. N’Arrow menten la llegada a la ciudá d’una metanfetamina azulono, pa facer un chiste más que nada, pero pa los tommywetphallinos enllaza esta y toles sos ponderes a Breaking Bad… Podríemos siguir asina tola vida, espardiéndose los esllabones per cientos de series y tamién películes y cómics. N’Angel, la pondera de Buffy the Vampire Slayer, apaez la empresa Weyland-Yutani que ñació na saga de películes d’Alien. Personaxes de les series yá coneutaes asomen tamién nos cómics de Marvel y na edición de coleicionista de la película Avengers: Infinity War.

Dalgunos tienen como afición facer casar toles pieces, otros rindiéronse y yá falen d’un multiversu Tommy Westphall, porque paez imposible encaxar coses como l’universu comiqueru de Marvel col cinematográficu, o que l’axente Mulder anecie tanto n’alcontrar nicios de coses sobrenaturales cuando hai superhéroes volando pelos cielos.

Sicasí, dexámosvos con un mapa del Universu Tommy Westphall (actualizáu hasta 2016) por si vos da coruxía saber si incluye la vuesa serie favorita, y una Wiki (calcando equí) onde podéis atopar cuálos son los elementos que la xuncen a les demás. Otru día falamos del Universu Wold Newton, que ye un poco lo mesmo pero partiendo de les noveles de finales del XIX y principios del XX. ¿Sabíeis que Fu Manchú, Phileas Fogg y el Profesor Moriarty son hermanastros? Pero bono, como dicimos, eso meyor pa otru día.

Leave a Reply

La to direición de corréu nun va espublizase.