Yá va unes selmanes que sabemos que la tercer temporada de Star Trek: Picard tien preparada una xunta que va prestar pola vida a los más trekkies. Y ye que, como ye la final de la serie, quieren despidise per tolo alto y van trayer personaxes míticos de la serie de la qu’esta ye pondera.
Tripulantes bien conocíos polos siguidores de The Next Generation, como Beverly Crusher, Worf o Geordie La Forge van apaecer per Picard, amás d’otros miembros de la tripulación que yá tienen pasao per ella como William T. Riker o Deanna Troi. Inclusive paez que tenemos un Data resucitáu, anque siempre podríemos tar ente otru personaxe interpretáu por Brent Spiner, yá que son unos cuantos.
El casu ye que yá nun ye namás una noticia, sinón que podemos velos interactuando nel épicu vidéu promocional acabante salir del fornu, y del que vos dexamos l’enllaz equí.
Star Trek: Picard ñació como una pondera de Star Trek: The Next Generation, la que tien la tripulación más popular dempués de la de la serie orixinal y con una llonxevidá de nada menos que siete temporaes y cuatro películes estrenaes nos cines. Dempués de pasar cuasi venti años diéron-y al capitán de la Enterprise esta serie propia, qu’acaba anguaño cola tercer temporada.
