Va como trés selmanes que la CMA (l’Autoridá de Mercaos y Competencia de Reinu Uníu) y la FTC (Comisión Federal de Comercio de los EEUU) se posicionaron en contra de que’l xigante informáticu Microsoft comprara Activision Blizzard y la ficiera parte de Xbox Game Studios, y llegaron a bloquiar la transaición al considerar que l’alcuerdu “alteriaría’l futuru del mercáu de videoxuegos na ñube”, ye dicir, que la empresa podría actuar como un monopoliu na venta de xuegos en llinia. Ye preciso recordar que Xbox ye la consola de Microsoft y una de les grandes competidores de Playstation, plataforma pa la que viende xuegos Activision Blizzard. Pero agora anúnciase que la UE aceuta la compra, magar que la CMA repite que ye un error y pue tener consecuencies graves pa la competencia y el mercáu llibre. Y ye que cada organismu tien independencia de los demás, claro, y decide según les condiciones del so mercáu.
¿Y qué ye lo que fizo a Bruxeles decidise por aceutar? Pelo menos de manera oficial, paez ser que’l compromisu de Microsoft a siguir ufriendo na plataforma los videoxuegos pa Playstation hasta pelo menos 2033, asina como garantizar el drechu a los compradores a tresmitir en streaming les sos partíes, cola mesma calidá y conteníos. Dende la UE sentencien amás que “nun tendría incentivos en dexar de facelo” y, anque lo ficiera, “Sony podría aprovechase del so tamañu, gran catálogu de xuegos y posición de mercáu pa defendese de cualesquier tientu de debilitar la so posición competitiva”.
Esta compra, según la comisión de la UE, va llevar precisamente a una espansión del mercáu y de la tresmisión de videoxuegos en streaming.
