Col puente de la Constitución, fueron delles les provincies qu’aprovecharon los díes festivos pa facer delles convenciones: al empar taben el Mangafest en Sevilla, la Madrid Comic Pop Up y la Ultralan en Valladolid. Ye d’esti últimu del que vos vamos falar güei.
La Ultralan Gaming Festival fízose en Valladolid los díes 4 y 5 d’avientu na Feria de Valladolid. Nesos dos díes, xente de Valladolid y d’otres provincies asistió a la primer convención que se fexo ellí dempués de la coronavirus: una convención centrada nos videoxuegos.
Durante los dos díes la convención ufrió una montonera d’actividaes perinteresantes como torneos, concursos y tamién charres y conferencies sobre desarrollu de videoxuegos, amás de tener una montonera de zones temátiques de dellos onde podíes xugar de baldre.
Dientro de los concursos, había dos de los habituales nes convenciones: cosplay y Coverdance. En cosplay tuvo como invitada la cosplayer Illisia, qu’amás foi xuráu nel concursu de cosplay. Nel concursu de cosplay tenía delles restricciones: solo se podíen ganar personaxes de videoxuegos y nun podíen ser versiones propies y de fans, teníen que ser les orixinales. Pagaba la pena porque había premios bien curiosos. Participaron más de diez persones, y dos de los premios algamáronlos dos cosplayers asturianos: Zananwars (col cosplay Ezreal Star Guadian del LoL) el de Meyor actuación y Shiroychigo (col cosplay de Gwen, tamién del LoL) el de Meyor Cosplay Individual de Videoxuegos.
No que cinca al concursu de coverdance, la participación foi ablucante: hebo más de venti actuaciones y delles yeren grupales. Había munchísimu nivel, porque en Valladolid hai bastante tradición nos concursos de coverdance, y dafechu dellos de los participantes llevaben más de diez años baillando k-pop. Foi tou un espectáculu.
Otra actividá venceyada col baille foi’l tornéu de Just Dance, nel que los apuntaos compitieron pa ver quién yera’l meyor baillarín y algamar una Nintendo Switch. Nun vamos negalo, foi prestoso y amás tuvo bien reñío. Tamién hubo torneos de League of Legends, Tekken, Pokemon Unite y una montonera de xuegos más, estos con premiu monetariu.
Charres y creación de videoxuegos
Una de les mayores ufiertes de la convención fueron les charres y clases maxistrales sobre la creación de videoxuegos. Taben organizaes pola EVAD (Escuela Superior de Videoxuegos y d’Arte dixital), onde s’ufren una montonera de ciclos y másters rellacionaos colos videoxuegos. Dellos de los docentes d’esta escuela yeren los que daben estes charres, polo que s’entendíen ensin dificultá nenguna, inclusive pa principiantes nel mundiu de la programación.
Amás, asistieron una montonera d’invitaos que participaron en charres, en alcuentros y tamién en torneos colos sos siguidores: Pandarina, Lucy Paradise, Team Aniyes, Hander o Twins of metal, ente otros.
La presencia asturiana nun quedó solo venceyada al cosplay: otra de les invitaes del eventu foi Elesky, una música y streamer asturiana que participó en delles actividaes, ente elles un conciertu con bandes sonores de videoxuegos y un duelu con otru streamer músicu invitáu Fromguer.
Fromguer tamién fizo un concursu mui orixinal d’aldovinar les canciones que taba cantando col pianu, nel que podía participar tol públicu y tamién xente que lu taba viendo en direutu. Pa ello, teníes qu’escribir el más rápidu’l títulu de la canción que tocaba col pianu nel chat del so direutu en Twitch. Pa los tres que más acertaron hubo hasta premiu.
La Ultralan taba organizada polos mesmes persones qu’organicen la Gamepolis, un eventu del sur con bastante percorríu que tien la mesma temática pero ye entá más grande. Esto amosábase, per un llau, en tol marketing del eventu (hebo publicidá en tola ciudá y tamién n’otres ciudaes de Castiella y Llión), y per otru, yá in situ, en tol control, distribución y organización d’actividaes. Amás, respetáronse y controláronse toles midíes de seguridá venceyaes a la coronavirus.
Ye la primer vez que se fai esti eventu en Valladolid, y esperemos que seya la primer vez de munches otres pa qu’en Valladolid haiga más variedá d’eventos (con continuidá solo teníen el Salón del Manga y el Cómic de Castiella y Llión). Quedáis convidaos a dir a la siguiente edición.
