Tenía una ilusión tremenda por ver Power Rangers: Once & Always, la vuelta del equipu orixinal pa un episodiu especial (d’una hora) con motivu del trentenu aniversariu de la primer serie. Y la verdá que, en viéndolu, quedóme una sensación bastante regulera.
Anque la primer engarriada enchipe, pola vuelta, la música y demás, yá vemos nella una falta importante de medios, asina como de los actores orixinales, de los que namás consiguieron recuperar a los Rangers Prietu y Azul. Ye a esti últimu, Billy, al que-y dan un especial protagonismu, volviéndolu cabezaleru del equipu y un empresariu tecnolóxicu al estilu de Tony Stark, quiciabes pa face-y un poco de xusticia al actor. Y ye que, siendo ún de los miembros más carismáticos del equipu orixinal, sábese agora qu’a David Yost ficiéron-y mobbing pola mor de la so orientación sexual, colo que nun-y foi cómodo facer la serie orxinal. Mientres, Zack (Walter Emanuel Jones) toma’l papel de padre adoptivu de la fía de Trini, la Ranger Mariella orixinal, pos el personaxe d’ella muerre namás principiar el capítulu. Recordemos que l’actriz, Thuy Trang, morrió na vida real en 2001.
Asina, ta bien xustificao que nun salga la Ranger Mariella, pero la verdá que queda bastante cutrono que’l restu de Power Rangers orixinales namás salgan con cascu y ensin dicir pallabra. Y ye que nun llegaron a un tratu con ellos, y esta ye la razón meta-argumental pola que Robo-Rita, la villana del episodiu, secuéstralos y fai tolo posible pa que nun garren nengún protagonismu. Son los Rangers posteriores, los que los sustituyeron a estos na serie orixinal, los qu’han siguir col legáu tamién nesti homenaxe, lo que queda más bien tirando a mal… Sobre manera, cuando vemos un Ranger Coloráu, agora bastante fondón, adelgazar de manera máxica al metamorfosiar.
L’estilu camp de la serie, hai que dicilo, ta mui bien revilváu, pero tanto qu’hai momentos de vergoña ayena nos que dan ganes de mirar pa otru llau. Hai momentos guapos pa los fans de la serie, eso sí, que de xuru van dexar ablucaos a los que nun la tengan visto, como puen ser la exhibición de Hip-Hop Kido de Zack (un arte marcial creáu por él y que consiste en pegar hosties baillando break dance) o’l coche volador de Billy. Guarden tamién un homenaxe a Thuy Trang y Jason David Frank, el Ranger Verde recién fináu, que difícilmente pue nun emocionanos, asina como una estructura bastante asemeyada a la de los episodios orixinales pa espertar la señardá de los más cafeteros.
La verdá que la historia queda como si tuvieren ganes de volver a facer una serie, o pelo menos más episodios especiales, pero la falta de medios y l’avieyamientu del mundu Ranger producen un choque col que resulta cuasi imposible nun rinchar los dientes. Si salen más especiales voi tragalos, de xuru, pero dame mieu lo que voi alcontrar.
