Últimamente tán toos buscando les razones de los últimos fracasos de los superhéroes en cine y canales de streaming. Y nun ye pa menos, porque les últimes películes de DC y Marvel, Blue Beetle y The Marvels, son les mayores derrotes de dambos dos estudios. Claro, les productores propietaries, Warner y Disney respectivamente, quieren saber qué ta pasando cola pita de los güevos d’oru, y el portal Indiewire señala agora (equí l’artículu orixinal) una posible causa bastante relevante: A la xeneración Z nun-y interesen los superhéroes. Y ye que, por casu, l’Universu Cinematográficu Marvel escomenzó en 2008 con Iron Man, y yá llovió daquella como pa siguir tirando de secueles.
Según un estudiu, el 30% de l’audiencia de The Marvels anda ente los 25 y 34 años, y solo’l 19% ente los 18 y 24. Ente los más rapazos la cosa ye peor, porque namás el 8% de los espectadores tienen ente 13 y 17. Los superhéroes queden, asina, como cosa de millennials, mientres que los centennials prefieren dir al cine a ver otres coses, como agora ye’l casu de la película de mieu, basada nun videoxuegu, Five Nights at Freddy’s. Pa que vos fagáis una idea del ésitu d’esta película en comparanza, basta con fixase nes cifres de la estrena: ochenta millones de dólares nel primer fin de selmana nos EEUU, mientres que The Marvels sacó cuarenta y seis.
Muncho nos burllamos de que les películes del oeste que ponen en TPA son pa los güelos… Pero la cosa pinta a que, dientro d’unes décades, a los güelos millennials van ponenos películes de superhéroes.
